Aizawl ah B20 meeting neih a ni

Aizawl March 2, 2023 : Pu Zoramthanga chuan tualchhunga thar chhuah theih thil tha tak tak- Horticulture leh Agriculture bakah ramngawte hmang tangkaia industry din turin B20 Meeting-a kalte chu a sawm a ni.

Chief Minister chuan Horticulture huanga thlai hrang hrang- dragon fruit, sapthei leh lakhuihtheite pawh a tha duh hle tih a sawi.Mizoramah Alovera a tha duh hle tih sawiin, mihring chenin a thang thei tih a sawia, Industry minister leh Advisor-te hnenah pawh sorkar laipui chuan industry din se a duh thu leh rawtna pawh a siam tawh thu a sawi a ni.

Inkalpawhna chungchang pawh chief minister chuan a sawi a, tuipui hmanga inkalpawhna- Kaladan project chungchang leh Tlabung kaltlangin Chhitagong, Bangladesh lawng chawlh hmun chu ni khatah thlen theih a la nih dawn thu a sawi bawk a ni.

Mau (Bamboo Sector) chungchang sawi bawkin, Mizoram leilung zaa 50 chu mauin a khuh a ni, a tia, scientist-te chhut dan chuan metric ton maktaduai 25 vel awm tih leh chungte chu tangkai taka hman a la nih loh thu a sawi a ni.

Vawiin B20 meeting-ah hian ngaih pawimawh zual zingah Màu ṭhatna te, mau hmanga thil siam chhuah theih hrang hrang leh hmasawnna hrang hrang a thlen theih te, puantah leh thiamhnang deh chhuah lama thil siam chhuah chungchang te, sumdawnna lama bul ṭanna start up hrang hrang te, nursing leh paramedics opportunities Bakah urban planning leh hmasawnna ruhrel tih hmasawn chungchangte a tel a ni. Technical session-ah zirhonate leh sawi hona neih a nih Bakah, heti lama sulhnu lo nei tawh ten thusawina hun an nei bawk a ni.

He hunah hian Mizoram atanga siam chhuah hrang hrang te chu exhibition stall ah ram đang palai te hmuh theih tura pho chhuah a ni.

He B20 ah hian sumdawnna lama palai 48 leh ram 17 atangin palai 17 te an tel a, ramdang palai bakah hian India palai 16 leh local start up 80 Chuang he hunah hian a tel a ni