March 10, 2023 (Rauthla) : Deputy Chief Minister Pu Tawnluia chuan Mizoram Health Service Rules siamthat (restructure) kawnga harsatna awm mek chingfel turin DP&AR in hma an la mek, a ti.

Vawiina Mizoram Government Doctors’ Association (MGDA) Annual General Conference vawi 37-na RB Mc Cabe Hall, Aijal Club-a a hmanpuinaah Deputy CM chuan Mizoram Health Service Rules siamthat (restructure) kawngah hma an lo lak tawh thinna te tarlangin, harsatna awm mek chingfel turin DP&AR in hma an lak mek thu leh Cabinet Meeting-a put luh thuai anih a beisei thu a sawi a. Doctor hna chu hna zahawm leh rawngbawlna ropui a ni tiin, tihdam hna an koah a tlak avangin an hnathawh leh mawhphurhna chu hna dang te aia a danglam thu a sawi a, midangte rawngbawl tura kawng zawh zel turin doctor-te chu a sawm a ni.

Dy. CM chuan mipui ten tangkai zawka Mizoram Health Care Scheme an hman a duhsak thu sawiin, a thei apiang he scheme-a inziaklut turin a sawm a, Asian Development Bank (ADB) Loan hmanga changtlung zawka Health Care Scheme kalpui a nih tur thu a tarlang bawk.

MGDA Annual General Conference hi MGDA Vice President Dr. C. Lalhrekima chuan kaihhruaiin, kum 2019-2023 chhunga an member pension a chhuak ta mi 24-te thlahna hun leh member boral mi 7-te sunna hun an hmang a. Chawhnu lamah hruaitu thar thlanna hun leh business session neih a ni.

Post a Comment

Powered by Blogger.