Lawngtlai, March 10, 2023 : Lawngtlai Police chuan mipuite chu internet online kaltlanga inbumna QR Code Scam lakah fimkhur turin an chah a. QR Code Scam laka mipuite, a bik takin dumdawngte kan lo inven theih nan a kalphung leh hriattirna a chhuah bawk.
Hemi chungchanga Lawngtlai Suprintendent of Police thuchhuaha tarlan a nih danin, QR Scammers te chuan phone leh internet kaltlangin an mi bum tum sumdawngte an be hmasa thin a, bungrua an mamawhte sawiin, a man zat te an zawt kual hmasa thin a ni. Sumdawng ten an rin theih nan an bank account details an dil a, a dik ngei e tih finfiah tum angin pawisa tlemte an transfer hmasa ve thin bawk. Chutianga an rinna an neih sak tawh hnu chuan full payment ti turin anmahni siamchawp QR Code Whatsapp message kaltlangin an thawn a, chu QR Code siamchawpa an scan veleh chuan an bank account detail chu an hre thei nghal vek a, bank account-a pawisa awm te pawh second reilote chhungin an ru chhuak thei nghal mai a ni.
Lawngtlai Police te chuan QR Code Scam laka mipuite kan fihlim theihna turin kan mi hriat chian loh te hnen atangin online-in QR Code hi scan tawp lo turin an ngen a, mahni bank account details, ATM Pin, OTP leh UPI ID te chu kan mi hriat chian loh te hnenah pe lo turin an ngen bawk a ni.
Post a Comment