Lawngtlai, March 15, 2023 : Vawiin khan World Consumer Rights Day, 2023 chu Lawngtlai DC Conference Hall-ah hman niin, Lawngtlai Additional Deputy Commissioner Pu Abraham Beirazi Khithie chu Khuallian a ni.

Pu Abraham Beirazi Khithie chuan India ramin The Consumer Protection Act, 2019 (CPA) tha tak kan neih thu leh chu chuan consumer-te tan ham?hatna hrang hrang duang a, consumer-te dikna chanvo tha taka min humhalhsak thu a sawi a. Lawngtlai District-ah consumer-te'n an chanvo palzutsak an nihin a thlenna tur dika thlen lova ngawih bopui mai a la tam nia a hriat thu sawiin, consumer-te'n an chanvo dik an chan theih nan huaisen a ngai a, huaisen tur chuan dan hriat a ngai tih a sawi a. Consumer-te chu CPA, 2019 leh an dikna chanvote hre chiang tura zir peih tur leh a tul hunah huaisen taka ding ngam turin a fuih a ni.

He hun hi Lawngtlai Sub-Divisional Officer (Sadar) Pi TT Beikhaizi chuan a kaihruai a. Lawngtlai District Consumer Protection Association Vice President Pu HT Sapsanga hnen a?angin DCPA chungchang leh an hma lak dan ngaihthlak a ni a. Kumin World Consumer Rights Day thupui, "Empowering Consumers through Clean Energy Transitions" tih hmangin P&E Lawngtlai Power Division-a Junior Engineer Pu Lalliantluanga Khiangte chuan PowerPoint presentation pein, boruak bawlhhlawh siam chhuak lo zawng leh chhehvel boruakin a tuar loh theih dan ber tura thahrui fai (clean energy) hman lama consumer-te than harh leh ke pen a tulzia a sawi a. Zawhna leh chhanna leh sawi hona hun hman zui niin, Lawngtlai District Civil Supplies Officer Pu Lal Rinsanga chuan lawm thu sawiin hun a khar a ni.

He hunah hian Lawngtlaia sawrkar official-te, consumer protection association leh tlawmngai pawl hrang hrang ai awhte an kal khawm a ni. 

Post a Comment

Powered by Blogger.