Rauthla 09.March,2023 : Lawngtlai district tlawmngai pawl lian leh chakber, Central Young Lai Association chuan Minister R. Lalzirliana chu Minister anihna atanga bang turin Chief Minister hnenah ngenna siam nawn leh a tum.
Vawiin khan Central YLA Executive Committee thukhawm chuan February 23, 2023-a Mizoram Legislative Assembly House a District Council & Minority Affairs changtu, Minister R. Lalzirliana thusawi chungchanga Mizoram Chief Minister hnena Minister chu a nihna atanga bang tura an ngenna tun thlenga ala hlawhtlin loh avangin Mizoram Chief Minster hnenah ngenna siam nawn leh ni se an ti.
February 27, 2023 khan CYLA te hian Mizoram Legislative Assembly Budget Session-a Mizoram Sawrkar-a District Council & Minority Affairs Department changtu Pu R. Lalzirliana’n, “Lem kan va der mai mai anih kha, saw lamah khan vote zawn nan kan va hmang mai mai a nih kha. An ni ho hian an lo awih ve em em a, kha chauh kha a ni, a ho tak tak a ni,” tih thu a sawi chuan Autonomous District Council area huamchhunga chengte rilru a tina in, ADC area-a cheng mipuite hmusitna leh thamlohna a ni tiin, hemi chungchang hi Central YLA chuan ngun taka ngaihtuahin hnam bil inhmuhsitna tawngkam, ADC area-a cheng mipuite inthamlohna lian tak ni-ah kan ngai a ni, an ti a. Hemi rual hian Central YLA chuan R. Lalzirliana, DC&MA Minister Minister chu ADC Area-a cheng mipuite rilru tina zawnga thu a sawi avangin he thu a sawina hmun, Assembly House-ah ngei hian ADC area-a cheng mipuite hnena ngaihdam dil tura an phut thu an tarlan bakah, Mizoram Rorelna sang ber neihna hmun meuh a hetianga ADC area-a mipuite hmuhsitna lantir duhtu DC&MA Minister an nei chu vanduaithlak an ti a, hetianga anmahni hmusittu-in DC&MA a enkawl chhunzawm hi a chhunga cheng mipuite tan a him tawk lovah an ngai a ni tih tarlangin, DC&MA Department enkawl tur hian midang ruat turin Mizoram Chief Minister an ngen thu an tarlang a, he an ngenna hi vawiin thlenga ala hlawhtlin loh avangin vawiin meeting chuan Mizoram Chief Minister hnenah ngenna hi siam ni leh rawh se, a ti a ni.
Post a Comment