March 6, 2023 (Rauthla) : IGP John Neihlaia chuan a duty pui mi pahnih kaphlumtu Havildar Bimal Kanti Chakma chu police atanga ban nghal a nih thu a puang.

Vawiina Press Conference a neiha IGP John Neihlaia chuan "Hav. Bimal Kanti Chakma, 2nd Bn. MAP, Luangmual, Lunglei, Assam ramri Buapchep post-a duty chuan nizan dar 6:16 khan Buarchep-a an main camp bul, Oil Palm hmuna NCO Barrack-ah a silai, AK-47 rifle hmangin a thawhpuite a kap tih a sawi a, hetah hian Hav. J. Lalrohlua (51), 2nd Bn. MAP, Luangmual, Lunglei chu a hmunah a thi nghal tih sawiin, "Hav. Indra Kumar Rai (53), 2nd Bn. MAP, Luangmual, Lunglei pawh Vairengte CHC thlenpui a nih hnuin zan dar 7:20 khan a hliam tuar lovin a thi," tih a sawi.

John Neihlaia tarlan danin, he thil thlenna hmun hi Buarchep post-a camp pangngai atangin meter 400 vela hlaa awm a ni a, helai hmunah hian NCO pathum (3) te hi duty turin dah an ni. Hav. J. Lalrohlua ruang hi choka chhuatah hmuh a ni a, Hav. Indra Kumar Rai hi inkahna hmun atanga feet 40 vela hlaah hliampui tuarin hmuh a ni. 

Hav. Bimal Kanti Chakma (56 yrs) s/o Sigan Morot Chakma, Luangmual, Lunglei, Camp: Buarchep hi Police escort-na hnuaiah rang takin Vairengte PS lamah hruai nghal a ni a. A sawi dan chuan Hav. J. Lalrohlua leh Hav. Indra Kumar Rai te hian a zu ruih thin thu hi Post Commander hnenah an report thin a, hemi tlai (5.3.2023) hian anni pahnih hnenah hian eng vanga post commander hnenah report thin nge an nih a zawt a, a thin a rim a, a silaiin a kap ta mai niin a sawi a ni. Hav. Bimal Kanti Chakma hi CJM Court, Kolasib-ah Judicial Remand turin thawn nghal a ni a, tukin zing dar 1:30 khan Kolasib District Jail dah luh nghal a ni. Hemi chungchangah hian Vairengte PS-ah case register nghal a ni a, a case No. chu Vairengte PS C/No. 12/23 Dt. 05.03.2023 U/S 302 IPC a ni. 

Hav. J. Lalrohlua hi a hnung lam atangin a lu-ah kah a ni a, Hav. Indra Kumar Rai hi a awm (chest) veilamah kah niin a malpuiah silaimu hi a tlang a ni.

IGP chuan Bimal Kanti Chakma chu Police-a awm reng tlaka an ngaih loh avangin inquiry ti loa ban nghal a nih thu a sawi a, ‘Danin thuneihna min pek tho hmangin kan ban nghal a ni,’ a ti

Heng mi pahnih vanduai ta te hi Ral laka thi ni chiah lo mah se, ramri a duty an nih avangin an chhungte hna pek an dilsak tih IGP John Neihlaia hian a sawi a, an dilna chu sorkar lam hotute pawhin an pawmpui thu a sawi lang bawk a ni.

IGP chuan he thil thleng hi chi leh chi inthliarna (communal thil) a nih loh thu a sawi a. ‘Zu rui pakhat in a thiante a kap a ni mai, chi leh chi, hnam leh hnam ang zawnga lak loh a tha kan ti’ a ti bawk.

Vanduaina tawk ta Hav. J. Lalrohlua (L), Lawgtlai Chanmari leh Hav. Indra Kumar Rai (L) te ruang hi Vairengte atanga an khua Lawngtlai leh Lungleiah te Helicopter hmanga thlen turin hma lak mek niin, an chhungte pawh sorkarin compassionate appointment a pe ang.

Post a Comment

Powered by Blogger.