Aizawl 07.02.2023: Kum 2001 bawr vela Tuirial Hydel Project siamna tura NEEPCO hmalakna a ram lakna leh zangnadawmna pek thu a thubuai chu CBI ten chhui in, khatih laia Aizawl DC pisa a ADC leh ASO-II hnathawk kawp Pu H. Lianzela MCS te, ram neitu a inchhal te - (i) Pu C. Vanlalchhuana S/o Darphunga (L) Electric Veng, Aizawl (ii) Pu Saiaithanga S/o Chhantuahlala, Tuithiang, Aizawl (iii) Pi C. Rokhumi D/o Chawnghuliana (L), Durtlang, Aizawl (iv) Pu Lalduhawma S/o Lalhungliana, Durtlang Leitan (v) Pu K. Lalrawna S/o Thangluaia (L), Champhai Bethel (vi) Pi P.C. Lalthazovi D/o Rodailova, Durtlang Leitan (vii) Pu K. Darkunga S/o Chalbera (L) ITI Veng, Aizawl te leh VC ram pass a Pu Sela hminga diklo taka hming lo sign tu-a puh Pu Lalrinsanga S/o Vanlalauva, Saipum, Kolasib District te chu thubuai siamsak an ni.
He thubuaia thutlukna chu vawiin khan Court of Special Judge chuan puangin, Pu H. Lianzela leh Pu Lalrinsanga te thiam an chan laiin, midang zawng chu thiam loh chantir an ni a, an zinga pakhat Pu K. Darkunga S/o Chalbera (L) ITI Veng, Aizawl chu a thih tawh avangin a thubuai tihtawp a ni.
Thiam loh chantirte hi inthurual tlangin VC ram pass lem siamna a inhnamhnawih ah te, VC ram pass lem hmangin zangnadawmna an dawn theihna atan sawrkara thuneitu te bum ah te, VC ram pass lem a dik ang taka lan tira zangnadawmna dawngah te Special Judge hian thiam loh a chantir.
Thiam loh changte hi vawiin khan Jail-ah dahluh nghal an ni a, naktukah a hremna tur Court chuan a puang ang
Post a Comment