Aizawl, the 7th February, 2023 : Journalist Pu Zomuanpuia Tlau (ZMP Tlau) Kolasib leh mi thahnemngai ten huaisen taka hma an lakna avangin High Court chuan Skywalk leh Ropeway sum hman dan chhui tura Central Bureau of Investigation a ko lut dawn ta chu MPYCC chuan lawmawm kan tiin, an hmalakna hi tha kan ti takzet a. An hmalaknate kan thlawpzia lan tir nan MPYCC chuan Journalist Pu Zomuanpuia Tlau chu Tawlhloh puan kan bah tir a, ram mipuite chanvo diktak humhimnaah hmala chhunzawm zel turin duhsakna kan hlan nghal bawk a ni.
Inkawmhona hun kaihruaitu MPYCC President Dr. Lalmalsawma Nghaka chuan thusawiin, Central atanga hmasawnna tur sum lokal project tihthuanawp leh tih khawtlai a ni hi MPYCC chuan pawi kan ti hle a. He Skywalk leh Ropeway chungchangah pawh hian Congress kha la sawrkar chhunzawm ila chu Sikkim rama a puitling tawh ang khuan a puitlin tawh ka ring a. Congress Sawrkar laia Tourism Minister Pu John Rotluangliana pawhin CBI koh luha chhui a ngam hi lawmawm kan ti a. He project-ah hian thil diklo titute an awm a nih chuan CBI hian chhuichhuakin dan anga hrem ni ngei se tih hi MPYCC duhdan leh dinna a ni, a ti.
Dr. Mala chuan, “Social activist ten ram khalhngil nana an hmalaknate hi mipuiten kan thlawp a pawimawh a, mipuiten Healthcare chungchangah kan dikna leh chanvo kan chan theih na tura Supreme Court thlenga hmalak an tum pawh hi kan thlawp takzet a ni,” tiin; NABARD atanga sum puk hmanga School hrang hrang thawmthatte a chingpen nasa lutuk hi Lok Ayukta-ah thlen tawh ni mahse High Court lama zualko hial tlak a ni a. Aviation Deptt-a eirukna ni thei ngeia ngaih Mizoram Lok Ayukta ten chhui tura CBI koh nise an tih tawh pawh hi MNF Sawrkar hian a tipuitling ngam dawn em? tih hi kan zawt nawn leh a ni, a ti bawk.
Pu Zomuanpuia Tlau chuan Mizoram leh hnam tana an hmalakna ngaihhlutpuitu leh thlawptu MPYCC chungah lawmthu a sawi a, ram leh hnam hmasawnna tura ke an pennaah MPYCC te fakawm a tih thu sawiin, ram rorelna chelhtu apiangte tan anmahni khalh ngiltu tha tak an awm a tul thin thu a sawi bawk.
Post a Comment