Siaha, February 9, 2023 : MNF Vice President Pu Lalthlengliana chuan "A hmunah ka kal chilh a, banna an thehluh document-te ka zir chiang a, social media-a kan lo hmuh ang ringawt ni lovin Siaha-a MNF bansantute hi a takah an lo tlem hle a, MNF kan la tam filawr ber a, kum 2023 MLA inthlanah he laiah leh Zoram pumah MNF kan tling leh ngei dawn," a ti.
MNF District Headquarters Siaha huaihawtin tukin zing khan New Siaha Bazarshed-a 'Street Campaign' neih neih a ni a, chhun lamah MNF party office Siahaa 'woker's meet neih a ni bawk. He hunah hian thu sawiin, MNF Vice President chuan, "nikum 2022 May thlaa Mara Autonomous District Council (MADC) kan inthlan khan MNF-in vote 13,796 kan hmu a. Tuna a chhuahsantute hi mi 90 vel chauh an lo ni. Tuna banna lehkha rawn thehlut tam ber hi a hma MDC inthlan laia kan party phatsantu leh kan party-ten party enrollment-a an telh loh party atanga hnawhchhuah sate an ni a. Min eptu tlemtein kan party beih nan, mipui tihchi-ai nan thudik tawk lo an vawrh darh mai mai a lo ni. Tuna banna thehlut nia dawt an phuahchawp zat aia tam fe chu MNF-a lawmluh mai hmabak kan nei a. Siaha District-a tawngkam lar thar tak 'Go Ahead Party (kal mai teh)' te hi tih tham an lo awm reng reng lo", a ti.
"Mizo hnam party beih nan thenkhat chuan an thiam fin kherek tinreng chhuahin YouTube, facebook leh whatsapp-ah te video tidarh a, document belhchian dawllo nen min bei a. Niminah he lai hmun Siaha Bazara public meeting kan neih pawh whatsapp-ah chuan police-te venhimna dil hial angin min lo sawi leh hman a. Police-te kha MSO (zirlai) ten Siaha DC chu sawn rih lo tura an duh avanga picketing neia duty-te an ni. Social Media kan hmang sual thin hi a pawi hle a, mipui hian thudik hriat chian hma chuan rilru sukthlek tihdanglam zung zung nan i hmang lo ang u. Inthlanpui a hnai tual tual ang a, tute emaw chuan thudik chanve chauh, dawt chi hrang hrangin min la rawn bei dawn a, hei hi hriain lo inveng lawk ang che u", a ti bawk.
Pu Lalthlengliana chuan, "MNF Vice President chuan MNF party atanga chhuak reng reng politics-a ding chhuak an awm lo, Pu Lalduhhoma ZMP leader-in MNF a chhuahsan hnuah kum 35 zet politics a hlawhchham pui a, Congress President Pu Lalsawta pawh MNF-ah kan MLA lo ni tawh, BJP President hi kan party-ah Joint Secretary lo ni tawh, candidate chan loh avanga BJP-a lut a ni. MNF atanga chhuakten an hruai ZPM, Congress leh BJP-te hian sorkarna an siam ngai lovang, MNF party chhuahsana lokir leh mi thenkhat erawh party-ah dinhmun sang tak chelhte an awm thin" a ti bawk.
Post a Comment