February 9, 2023 (Rauthla) : ZPM Ṭhalai hruaitute chuan vawiin khan an Vice President Pu Zoramchhana Sailo hoin Mizoram Institute of Comprehensive Education (MICE) School, Tuikual South a mi chu an tlawh a, MICE School sak danah thil dik lo tam tak an hmu chhuak tih an sawi.
Hemi chungchanga vawiina an thuchhuaha an tarlan danin, laboratory room tur chu bo hmakin, a chhawng hnuai bera room tih pum a ni lova, retaining wall pawh hi a awm zat tur a awm kim lo niin an hria a. Tin, retaining wall hian school building a do vek tur nia a lan laiin, a then laiah chuan a beam chinah chauhte a do a, ruah sur huna tui hawk luanna tur leh tui chhe luanna tur hrim hrim tui luankawr engmah hmuh tur a awm lo. School building chung berah hian railing (tlâk dal / vawn ban) siam vek tur nia ngaih a nih laiin, railing hi hmun tam zawkah siam a ni lova, hei hi naupang himna atan a derthawng hle niin an hre bawk; toilet chungchangah pawh a nih tur ang a ni lo nasa hlein an hria a, floor tinah naupang ten zunram thiarna an nei tur nia a lan laiin third floor-ah chiah toilet hi siam a ni a, naupangte'n harsatna an tawh phah rin a ni a, an toilet siam awmchhun pawh hi duh angin a ṭha tawk lo hle. He sikul sakah hian rikrum thila chhuahna tur 'emergency exit' pawh siam a ni lova, rualbanlo-te kalna tur siam tura ruahman a nih laiin, hetiang hi hmuh tur a awm hek lo.
ZPM Thalai chuan,' MICE school sak dan hi a tha tawk lo va, bang a lai leh a sira khi chat a tam hle a, kawngkhar chokut-te pawh themlem te te hman a ni hi ZPM Thalai chuan pawi kan ti hle a ni. MNF sawrkârin contract hna chhe lutuk hlir min hlui hi mipuite hmuhsitna ah kan ngai a, CBSE school kan neih ve chhun lehzel pawh hetianga phuailuaia min hlui duh sawrkâr kan hrawn hi vanduaithlak kan ti a, MNF sawrkârin zirna hi thu tak hla takah a ngaih lohzia a lang chiang hlein kan hria; MICE School sak dan phuailuai lutuk chungchângah hian budget session neih lai ngeia insawifiah turin MNF sawrkâr kan phut a ni' an ti.
Post a Comment