Borapansury, February 9, 2023 : Mizo Zirlai Pawl (MZP) chuan vawiin khan Zofate Chawlhbuk, Borapansury Lawngtlai District-ah Special Assembly neiin, an Assembly vawi 66-na, nikum 2022 a Darzo-a neiha thu an lo dah tawh leh thupawimawh tak tak an rel zingah 'Mizoram chhunga Chakma Foreigners awmte hnawhchhuah a nih theih MZP-in hmala rawh se' tih a tel.
Vawiina Special Assmbly hi MZP General Headquarters President Pu Lalnunmawia Pautu in a kaihruai a, Pu Lalnunmawia chuan, "Ram in chhan a ngaih chuan, MZP khawiah nge a awm? tih a ni fo thin a. Kan ram leh hnam tan MZP hi kan ding tlat tur a ni" a ti. "Borapansury hi CADC chhung Mizoram chhung ngei a nih avangin, ram chhan nan leh hetiang laia Zofa zin veivakte chawlh hahdam nan MZP hruaitu hmasa ten hetiang laiah Zofate Chawlhbuk an lo din a, a hlu takzet a ni" a ti bawk.
Vawiina an thurel langsar zualte chu - Mizoram chhunga Chakma Foreigners awmte hnawhchhuah a nih theih MZP-in hmala rawh se tihte, Mizoram chhunga hnamdang dan loa sumdawngna kalpui mekte hi MZP-in dapchhuah nise, Mizoram sawrkar-in tihtawp a nih theih nan hma lak ni rawh se tihte, Kan Mizo nunphung leh kan history te a tam thei ang ber zirlaibu-ah telh a nih theih nan MZP-in hmala rawh se tihte, Kum 2019 a Mizoram Legislative Assembly-in a lo passed tawh, Mizoram Governor- in a pawmpui loh, “The Mizoram Maintenance of Household Register Bill 2019” hi a hlawhtlin theih nan MZP-in hmala rawh se tihte leh Mizoram zirna in hrang hrang School, Hostel Fees leh Facilities a in mil em tih zirchiangin a tul angin MZP in hmala rawh se tih te a ni.
Rorel zawh hnuin, MZP hruaitute leh Borapansury V.C te chuan inkawmna hun an nei a. Borapansury leh a chhehvel a Chakma Foreigners a ruka Mizoram a lo lutte chungchang leh, hmalak ho dan tur an sawiho nghal a ni.
MZP Special Assembly-ah hian MZP General Headquarters, Headquarters, Sub Headquarters, Branch, College SU leh Hnampual zirlai pawl aiawh te an tel a ni
Post a Comment