Parva, February 9, 2023 : Vawiin (09.02.2023) khan Mizoram Journalist Association, Lawngtlai District te chuan an President Pu Lalngheta Ralte hoin Parva-III hmuna Bangladesh atanga raltlan awm te an tlawh.
Pu Lalngheta Ralte chuan raltlan te chu an harsatna tanpui tura kal an nih loh thu leh an harsatna te chu hriatpui a, thuneitute hnena hriattir chu an thil tum a nih thu a sawi.
Pu Rualdolala, Parva-III Village Council-a an Vice President chuan, nikum November 20 atang khan Bangladesh atangin kan unaute an ram buai avanga an sahimna zawnga an rawn tlan luh thu leh an ni pawhin theihtawp chhuaha an lo buaipui thu a sawi a, khaw lian an nih loh avangin sahimna zawnga lokal te chu an duh ang pawha an buaipui theih lo chu pawi a tih thu a sawi bawk a ni. Heng Bangladesh atanga sahimna zawnga lokal te an buaipui thawm chu Zoram hmun hrang hrang atangin an lo hriat avanga an mahni tanpuitu zawng zawng te chungah lawmthu a sawi bawk a ni.
"Pu Rualdolala chuan, tun dinhmunah hian heng raltlan te zingah hian khawtlang tan min hnawksak tumah an awm lova. Ei leh bar lamah harsatna Lian tak an tawk lova. Buhfai lamah harsatna an tawk zeuh zeuh tih leh tui chungchangah harsatna lian tak an tawk mek a. Keini a khaw neitu te erawh sorkar in tanky tha tak min pein tui lamah harsatna kan nei lova. An ni erawh duh dah khawl na tur Syntex an neih loh avangin tui lamah hian harsatna namen lo an tawk a, sorkarah pawh kan thlen tawh a, tunah hian sorkar pawh kan ngaichang mek a ni" a ti.
Pu Rualdolala chuan, refugee relief Committee din anih thu sawi langin, anmahni puala tanpuina lo lut sum leh pai te leh an mamawh hrang hrang lo lut te chu he committee kaltlang hian sem a ni thin a. An harsatna te pawh Relief Committee-ah an thlen thin thu sawiin, tunah hian khaw tuala an awm theihna turin Refugee card pawh sorkar lama siam sak turin kan thlen mek a ni, a ti bawk
Pu Eliazara Renthlei, Tuichawng Group YMA Fin. Secretary chuan, "kan ram thenawmah kan unaute mangang takin an awm tih kan hria a, heng thu kan hriat hian keini pawhin hrehawm kan ti em em mai a. Chuvangin, an sahimna zawnga kan hnena rawn kal nachang an hria hi lawmawm kan ti a. An sahimna tura kawng an zawhna kawngah keini pawhin engtik lai pawhin tanpui hi kan inhuam reng a. Ramriin min daidang mahse, unau kan nihnaah hian ramri a awm ve lova, an thlavang hauh a, buai a tul a nih chuan anmahni duh lova, lo dang thin tute nen buai a tul pawhin kan inpeih reng a ni" a ti bawk.
Tun dinhmunah Bangladesh raltlan te hi mi 295 an awm tawh thu an sawi a. Parva-III bikah hian chhungkaw 36 awmin mihring 162 an awm mek bawk a ni.
Post a Comment