February 28, 2023 (Rauthla) : Vawiin Mizoram Assembly budget session neih mekah Lawngtlai West bialtu MLA Pu C. Ngunlianchunga zawhna chhangin Sports & Youth Services Department changtu Minister Pu Robert Romawia Royte chuan Lawngtlai College Venga Lawngtlai Residential Sports School chu sak zawh a nih hunah Sports & Youth Services Department-in a enkawl tur thu a sawi a. YLA College Veng Branch te hnenah neitu nihna hlan theih a ni ang em? tih a zawhna chu Pu Robert Romawia Royte chuan “Sorkarin tangkai taka hman zui dan a ruahman ang” a ti.
Sports Minister chuan Lawngtlai Residential Sports School hi a nihna ang turin a kal theih ngei a rin thu a sawi a, thawktute pawh central lam puihnain dah kim theih a nih a rin thu a sawi. Sports Minister chuan, Kohhrante pawhin he school hi enkawl an duh thu an sawi a, inbiakna a kal zel ang a, Sport Department pawhin direct-in i enkawl ang u, kan ti maithei a. Chutiang ang tur chuan sponsor leh CRS fund-te pawh kan hmu thei turah ka ngai, a ti.
Pu Robert Romawia Royte chuan School building pawh a beisei aia an sak chak thu sawiin, ruahman dan chuan nakuma sa zo tur an ni a, kuminah an sa zo dawn mai a, hei vang hian kuminah chuan a function hman dawn lo tih a sawi bawk.
Sports Minister chuan “Sport School sakna tur hian a hmun vel hi YLA College Veng Branch in min hlan a, LSC pawh department hminga siam vek tawh a ni a, YLA College Veng Branch chungah lawmthu ka sawi a. Mamawh an neih thenkhatte kan tihsak dawn a, chutiang tur chuan budget provision pawh kan nei a ni” a ti.
Post a Comment