Lawngtlai, February 27, 2023 : Central Young Lai Association chuan, February 23, 2023 a Mizoram Legislative Assembly Budget Session-a Mizoram sorkara District Council & Minority Affairs Department changtu Minister Pu R. Lalzirliana'n Autonomous District Council (ADC) chungchang a sawinnaa “Lem kan va der ve mai mai a nih kha saw lamah khan, Congress-ah khan vote zawn nan kan hmang mai mai a nih kha. An ni ho hian an lo awih ve em em a, a ho tak tak a ni" a tih chuan Autonomous District Council (ADC) huam chhunga chengte rilru a tihnat thu sawiin, District Council & Minority Affairs Department changtu Minister berin hetianga ADC area mipuite hmusit leh tham lo taka a tawng khum chu pawi an tih thu an sawi.
Vawiin thuchhuah an siamah, CYLA chuan Minister tawngkam hi hnam bil hmusitnaah an ngaih thu sawiin, ADC a chengte inthamlohnaah an ngai tih an sawi. CYLA chuan, District Council & Minority Affairs Department changtu Minister Pu R. Lalzirliana hian ADC Area-a chengte rilru a tihnat avangin he thu a sawina hmun ngei Assembly House-ah ADC mipuite hnenah ngaihdam dil turin an phut tih an sawi a. Pu R. Lalzirliana'n District Council & Minority Affairs Department a enkawl chhunzawm chu a chhunga chengte tan him tawk loah an ngai tih sawiin, CM Zoramthanga chu DC&MA enkawl turin midang ruat turin an ngen bawk.
He an ngenna leh beiseina hi a hlawhtlin theih nan leh ADC area hmasawnna turin CYLA chuan hma a la zel dawn tih an sawi a, an duhna leh ngennate hi tihhlawhtlin a nih loh chuan a tawp thlenga hma an lak chhunzawm zel tur thu an sawi bawk a ni.
Post a Comment