February 28, 2023 (Rauthla) : February 23, 2023 a Mizoram Assembly Budget Session-a District Council & Minority Affairs changtu Minister Pu R. Lalzirliana’n Autonomous District Council Area-a chengte rilru tina zawnga thu a sawi chungchangah vawiin Assembly Session-ah ngaihdam a dil.
Pu R. Lalzirliana chuan, “ka tawng kha ka han ennawn leh hian ka duh zawng a ni hauh bik lova, he ka tawngkam hian mimal pakhat rilru a tihnat pawh hi ka duh lova. Chhim lam unaute rilru ka lo tina a ni tih ka hria a, an chungah ngaihdam ka dil a ni” a ti.
Pu R. Lalzirliana chuan District Council & Minority Affairs department enkawl turin chak zawkte an duh angin pek theih a nih chuan ka lawm ngawt ang a, dilnate pawh ka thehlut nghal nise a tha ang, a ti.
February 23, 2023 a Mizoram Legislative Assembly Budget Session-a Mizoram sorkara District Council & Minority Affairs Department changtu Minister Pu R. Lalzirliana'n Autonomous District Council (ADC) chungchang a sawinnaa “Lem kan va der ve mai mai a nih kha saw lamah khan, Congress-ah khan vote zawn nan kan hmang mai mai a nih kha. An ni ho hian an lo awih ve em em a, a ho tak tak a ni" a tih chuan Autonomous District Council (ADC) huam chhunga chengte rilru a tinain, nimin khan Central Young Lai Association (CYLA), Lai Student’s Association (LSA) leh Lai Women Association (LWA) te chuan Pu R. Lalzirliana chu House ah ngaihdam dil tura an phut thu leh a enkawl mipui bum duhtu chu anmahni enkawl zui tura an duhloh thute an tarlang a ni.
Post a Comment