Parva, February 9, 2023 : Tukin zing (09.02.2023) khan Parva Helipad-ah Lawngtlai District MJA leh Parva hmuna Assam Rifles awm te chuan Parva khawtlang tan a thlawna in entirna an buatsaih a, a thlawnin damdawi an pe bawk.
Parvaa Assam Rifles awm te leh Parva khawtlang te inkarah engmah harsatna awm lovin an in tanpui tawn thin thu leh an harsatna tam zawk chu Assam Rifles ten an tanpui thin thu Pu Laldingliana, Parva-II VCP chuan a sawi.
Assam Rifles te hian thla tin Parva khawtlang tan a thlawna in entirna an buatsaih thin thu leh damdawi te pawh an neih ang angte a thlawna an pek thin thu a sawi lang bawk a. Tin, Infiamna kawngah thalaite'n hma an sawn theihna turin tournament te an buatsaih sak thin a. A bik takin Football leh Volleyball-ah phei chuan nasa taka hma an sawn bakah infiamna hmanrua pawh a thlawna an pek thin thu a sawi lang bawk a ni. Zirna kawngah pawh nise, thawhhona tha tak an nei bawk a. Khuarel chhiatna a lo thlen chang pawhin Assam Rifles te hian an hmanraw neih ang ang te thawhchhuahpuiin khawtlang mite ten an harsatnaah an inpuih tawn thin thu Pu Laldingliana VCP Parva-II chuan a sawi lang bawk a ni.
Pu Lalngheta Ralte, President Lawngtlai District MJA chuan, Assam Rifle ten an ngenna ngaipawimawh a, khawtlang tan a thlawna in entirna an buatsaih thei chu lawmawm a tih thu a sawi bawk a ni.
Tuna Parva hmuna Assam Rifles awm mek te hi 3rd Assam Rifles Naga Hills te an ni.
Post a Comment