February 9, 2023 (Rauthla) : Tukin zing dar 1 vel khan Burma kawl sipai ho luah lai, Thlantlang Police camp chu Chin hnam sipai CNA leh CDF tangkawp ten an la a, ralthuam leh bungraw tam tham tak an man sak. He thil thleng avang hian Burma sipai thlawhna ten Kalaymyo air base atanga Jet fighter thlawk chhuakin, tukin zing dar 6:30 vel khan Lungler khaw hmawra CDF camp hlui leh sikul building an bomb. Burma/Kawl sipai bomb thlak avang hian thi leh hliam an awm hriat a ni lo.
Lunglerh khawtlang an thlabar hle a, thlawhna hi rawn kal leh tura sawi a awm avangin khawtual mipui ten khua tlan chhuah sanin ramhnuai thlam leh pukte belin an tlan darh vek niin thu kan dawng.
Tukin zing vek dar 9:30am vel khan Burma sipai lam hian thlawhtheihna hmang bawkin Tlangpui CNA camp an bomb chiam bawk a, thi leh hliam an awm hriat a ni lo.
Thlantlang khaw lu-ah Burma/Kawl sipai camp a awm a, kar hnih vel liamta atang khan CNA/CDF te hian he burma sipai camp-a awm te hi che chhuak thei lovin an dang bet tlat a. Burma sipaite 6 te chuan khaw chhung-ah ei leh in lam tura an rawn kal chu CNA/CDF te hian an lo man a, an hreng zui ta a ni.
Burma sipaite hian khawchhung thlanmual hmun rem takah police station an nei bawk a, hei hi an hmang tangkaiin an luah lum thin hle. He police camp hi nizan (tukin zing dar 1 vel) khan CNA/CDF te chuan beiin an la ta a ni. He inbeihnaah hian CNA mi pakhat a thi a, tunah hian Camp Victoria lamah a ruang phurh thlen tum mek a ni. Burma sipai lam hi engzat chiah nge thi hriat theih an ni rih lova, ruang 4 erawh hmuh a ni. Burma sipai te tlanchhiat san ralthuam leh bungrua te hi a tam tham hle niin thudawnna chuan a sawi.
Khaw chung tlang lama burma/kawl sipai camp hi drone hmangin nasa taka beih a ni bawk. Hetianga an indonaah hian CNF lam hian drone an hmang tangkai em em thin a, drone deptt hi a bikin an nei a, Camp Victoria-ah office mumal tak an nei a ni.
Post a Comment