Lawngtlai, February 15, 2023 : Lawngtlai Bawrhsap thar Pu David Lalthantluanga chuan vawiin khan Mizoram Journalists' Association (MJA), Lawngtlai District member-te chu a pisaa lengah sawmin, District hmasawnna atana hma lakna tur pawimawh hrang hrang a sawipui.

Lawngtlai Bawrhsap chuan chanchinbu mite chu khawtlang leh ram hmasawnna atana mi pawimawh tak an nih thu leh, sawrkar khalh ngiltu an nih thu sawiin, District Administration leh MJA te thawh hona ṭha a awm chuan District-in nasa takin hma a sawn dawn a ni, a ti a. Lawngtlai District-a inrelbawlna chungchang leh hmabak awmte tar langin, District MJA member-te chu Lawngtlai District tan theih tawp chhuaha thawh hopuiah a sawm a, mipui rawngbawlna leh District hmasawnna hna thawh kawngah a ṭulna apianga amah finchhuah a, thurawn pe ṭhin turin a chah a ni.

Bawrhsap leh District MJA member-te inkawm hona hunah hian Additional Deputy Commissioner Pu Abraham Beirazi Khithie leh Lawngtlai District Information & Public Relations Officer Pu C. Lalhruaitluanga te pawh an tel a. District MJA te hi an President Pu Lalngheta Ralte chuan hovin, Bawrhsap hnenah hian District MJA Patron a nih hriattirna lehkha bakah, District MJA Welfare & Pension Rules bu leh District MJA muffler an hlan nghal a ni.

District MJA hruaitute chuan DC thar leh Additional DC tharte chu Lawngtlai District-ah an lo lawm tih sawiin, District hmasawn nan eng lai pawhin MJA chuan sawrkar an thawhpui thei reng tih an sawi a. DC hi District MJA hna thawh dan leh hma lakna tlangpui hrilhfiahin, kumin February ni 8 leh ni 9-a Parva tlawha an zinnaa Bangladesh aṭanga sahimna zawnga lo tlan lutte an tlawh report bakah, hma lakna tura an duh hrang hrangte DC hnenah hian an thlen a ni.

He hunah hian Additional DC leh DIPRO te pawhin an ngaih pawimawh zawng an sawi a. Inhmel hriatna thingpui in ho a ni bawk 

Post a Comment

Powered by Blogger.