February 15, 2023 (Rauthla) : Mizote footballer zinga thleng sang ber, hlawhtling ber te zinga mi leh India mipuiin Mizote zinga an hming hriat lar ber kum 32 mi, Jeje Lalpekhlua Fanai chuan a hliam a dam chian theih loh vangin a tum aia hma in football a chawlhsan dawn ta.
February 16, 2023 zan dar 8:00pm hian Aijal club Hyves ah thlahna hun hi hman a ni ang. He hunah hian Pu Lalnghinglova Hmar in thlahna thu leh Jeje Lalpekhlua chanchin a sawi ang a, AIFF President, India captain Sunil Chhetri, Abhisek Bachchan, Chief Minister Pu Zoramthanga leh Sports Minister Pu Robert Romawia ten thlahna, duhsakna thu an sawi video pholan a ni bawk ang. He programme hi LPS leh ZONET ten an LIVE ang a youtube lamah Live a pek chhuah a ni bawk ang.
Hnahthial khaw chhuak Jeje Lalpekhlua hi football ngaina tak chhungkua atanga chawr chhuak a ni a. A pa khelhna club Model Supporting Club ah bultanin, a hming a rawn chherna tak chu Wai Wai Cup ah a ni. Heta a chet that em avang hian Mizoram U-19 team-ah thlan a ni a. Pune FC scout ten chhinchhiahin, kum 16 a tlin kumah contract an ziah pui a, I-league 2nd division lamah a inchher hriam hnuah I-League 1st Division-a a goal hmasa ber chu Sporting Goa lakah October 2009 khan a khung.
Kum 2010 ah Pailan Arrows-ah loan-in a kal a, hetah hian a hming a chher hle a, 2010-2011 season-ah I-league-ah goal 13 thunin, Indian player zinga goal thun hnem ber a ni a, FPAI Best Young Player Award hlan a ni. July 2011 ah Pune FC ah let lehin, he club tan hian goal 16 a thun.
Kum 2013 khan Dempo chuan an lalut a. he club-ah hian season khat chamin goal 5 a khung.
May 2014 ah Mohun Bagan-in an lalut a, hemi kum vek September thlaah Chennaiyin lamah loan-in a kal a, hemi season hian goal 4 khungin, Indian player zinga goal khung hnem ber a ni. Hemi kum vek December thlaah Mohun Bagan-ah a let leh a. Chennaiyin in Indian Super League an khel dawn a, Jeje Lalpekhlua chu an lalut leh a. Kum 2015 season-ah Chennaiyin chu ISL ah champion puiin, goal 6 a khung a, Emerging Player of the Season-ah thlan a ni. Kum 2017-18 season-ah goal 9 thunin, Indian player zinga goal khung hnem ber a ni a, a tum hnih nan Chennaiyin chu ISL ah a champion leh. Kum 2018-2019 season-ah goal khat a khung a, khup hliamin a tihbuai avangin kum 2019-2020 season khan a inlan lova, hemi hnu hian club a chhuah san. Kum 2016 leh 2017 ah Mohun Bagan-ah loan-in kal a, hemi season hian Best Indian Footballer-ah thlan a ni. Mohun Bagan tan hian I-League title vawi khat a chawi pui a, Federation Cup vawi khat a chawi bawk a ni.
A hun tawp lam October 2020 khan kum khat atan East Bengal a zawm. He club tan hian match 7 khelin, goal 1 a khung.
Mizo Sniper hian ram tan Indian U-19 leh Under-23 ah a inlan hnuin, kum 2011 khan a vawi khat nan senior team-ah koh a ni a, 2-1 in Myanmar an hneh a, goal a khung. Indian National Team tan match 56 a khel a, goal 23 a khung thei a ni. Ram tan hian SAFF Championship title chu kum 2011 leh 2015 ah a chawi pui a, Kum 2017, 2018 ah Intercontinental Cup a chawi pui bawk.
Mimal chawimawina a dawnte :
- FPAI Best Young Player Award: 2010–11
- AIFF Emerging Player of the Year: 2013
- Indian Super League Emerging Player of the League: 2015
- Federation Cup Top Goalscorer: 2015–16
- Federation Cup Best Player: 2015–16
- FPAI Indian Player of the Year: 2015–16
- AIFF Player of the Year: 2016
- Indian Super League Fans' Player of the Month: December 2017
Post a Comment