Inrinni zan Premier League inkhelah, league hmahruaitu Arsenal chuan Everton an tlawh a, Arsenal hi si khat faiin an tlawma, Goodison Park-a goal awmchhun hi James Tarkowski-a thun a ni.
Arsenal hian point 3 pawimawh tak an chana, Everton erawh hian point 3 hlu tak an hlawhchhuak thunga, hei hi season kal meka, Arsenal vawi hnih tlawmna chauh a ni.
Khelh 20 atangin Arsenal hian point 50 an hlawhchhuak tawha, pakhatnaah awm chhunzawm zelin, pahnihnaa awm Manchester City nen point 5 in an inthlau. Everton dinhmun a tha lova, tunah hian 18-naah an la awma, khelh 21 atangin point 18 bak an la hlawhchhuak lo.
Everton hian season an hman chhiat em avangin, thla hmasa ni 23 khan an manager Frank Lampard an ban a, Burnley manager hlui Sean Dyche an lalut. Arsenal laka an game hi Dyche-a hnuaia Everton game hmasa ber a ni a, hun rei tak league hma hruai tawh Arsenal lakah hnehna pawimawh tak an chang nghal.
Everton leh Arsenal inkhela goal awmchhun hi 60mins-a lut a ni a, corner atanga McNeil-a ball vawrh luh chu, English defender James Tarkowski chuan lo tauh lutin, hei hi Everton chuan an chakpui ta a ni.
Everton hian an next match-ah Liverpool an mikhual dawna, Merseyside derby atan hian kar khat chuag inbuatsaihna hun nei dawnin, tun thla ni 14-ah an khel ang. Arsenal hian kar leh Inrinni zanah game an nei a, ni 11 zanah hian Brentford an mikhual dawn a ni.
Post a Comment