A zawna game thum Premier League-a chak zo tawh lo Liverpool chuan Wolves an tlawh a, si thum faiin Jurgen Klopp leh a nau te an tlawm a, Wolves hian point 3 pawimawh tak an hlawhchhuak.
Molineux Stadium-ah hian Craig Dawson leh Ruben Neves te chuan goal khat ve ve an thun a, Liverpool defender Joel Matip chu a own-goal bawk.
Khelh 20-ah Liverpool hian point 29 an hlawhchhuak tawha, 10-naah an awm mek. Wolves hian khelh 21 atangin point 20 an nei a, 15-na dinhmun an luah mek ve thung a ni.
Inkhel an tan hnu lawkah Hwang Hee-Chan-a cross chu Matip hian an lamah a thun palha, 5mins an khelhin Wolves in si khat faiin an hruai nghal. Minute sarih hnuah Wolves defender thar Dawson chuan Wolves tana a game hmasa berah goal a thun ve leha si hnih faiin Wolves hma a hruaipui.
Second half-ah Liverpool in first half aiin hma sawn hret mah se, an chance neih te erawh goal ah an chan tir thei lo. Liverpool in inkhel an thunun laiin, Wolves hian 71mins-ah goal an rawn khung belha, Adama Traore ball pek chu Wolves captain Neves chuan goal-ah khungin, 3-0 inkhel a tawp.
A inkhel ah hrim hrim hi chuan Liverpool hian an hneh zawk niin a lang a, maseh a pawimawh ber goal khung thei lo, Liverpool chu an pul chhunzawm leh ta a ni.
Premier League-ah Liverpool hian kuminah hnehna an la chang lova, ni 14-ah Everton an tlawh dawna, Wolves hian kar leh Inrinni zanah Southampton an tlawh ve bawk dawn a ni.
Post a Comment