Aizawl, February 8, 2023 : BJP Mizoram Pradesh Vice Presient R. Vanramchhuanga chuan Mizoram sorkar chu ramri buai chin fel tum lova, mipui bumna atan chauha hma la an ni tih a sawi.
BJP Vice President chuan Aizawl Press Club-a vawiina thuthar thehdarhtute a kawmnaah, Assam CM Himanta Biswa Sharma-an Mizoram CM Zoramthanga chu dinna a hre chiang tih sawiin, chumi avang chuan Assam police te chu Mizoram chhungah ngei, an duhna hmun hmunah camp siamin an awm chilh hmak hmak zel tih a sawi.
R. Vanramchhuanga chuan, 'Assam CM chuan intithei takin December 12, 2022 khan Assam Legislative Assembly-ah Mizoram Acre 1800 kan laksak tiin a sawi a nih kha. Mizoram Home Minister-in Assam sorkarin Mizoram an lak kan hre lo, ti mahsela, Kolasib leh Mamit huam chhunga Assam Police awm tlat te khu Mizoram sorkarim a um chhuah loh chuan Mizoram leilung zau tak mai hi Assam hian min chhuhsak ngei a ni' a ti.
November 17, 2022 a Mizoram leh Assam Minister te inbiakna vawi 3-naa joint statement an siam point khatnaah, Mizoram sorkarin Mizoram chhunga rin luh a duh chin ram, khua leh a chhungachengte leh sawi tur dang awm apiang thla 3 chhungin buatsaih fel turin Mizoram sorkar kutah mawhphurhna dah a ni, tih Vanramchhuanga chuan a sawi a. 'An inbiakna atanga thla 2 a ral hnu January 20, 2023 ah khan Mizoram sorkarin home minister hovin boundary committee a ko chauh a, chu committee chuan Mizo luah chin ram leh thil pawimawh dang awm apiang chhui chhuak tur Study Group din turin rawtna a siam a, mahse vawiin thlengin Mizoram sorkarin notification pawh a la tichhuak lo' a ti.
Post a Comment