Rauthla, November 22, 2022 : Union Minister of State for EF&CC and Consumer Affairs, Food and Public Distribution, Ashwini Kumar Choubey-a’n nimin khan Mizoram a rawn thleng.
Minister hi Supply Minister Pu K. Lalrinliana’n Lengpui tumhmunah a lo hmuak a. Minister hian Raj Bhavan pan nghalin reilote a chawlh hnuah Mizoram BJP pisa, Atal Bhawan, Upper Republic, Aizawl-ah Mizoram BJP hruaitute a kawm a, hemi hnu hian Mizoram BJP party mi leh sa te nen an inkawm zui.
Minister chuan Union Minister ten hmarchhak an tlawh fo chhan chu Prime Minister-in tlawh tura a tih vang a nih thu leh kum 75 chhunga ngaihsak hlawh tawk lo te chu ngaihsaka an harsatna hriatsak a duh a ni, a ti a. Heng minister te hian Prime Minister hnenah an state tlawh chanchin leh puih an ngaihna hrang hrang an thlen leh thin thu leh hemi hmang hian state harsatna hrang hrang Prime Minister-in a chinfelsak tur thu a sawi a ni.
Minister chuan covid hri len laiin Health changtu Minister a nih thu leh India ram mai bakah ram hrang hrang pawhin an tuar thu a sawi a, India-ah chuan Prime Minister Narendra Modi-a kaihhruaina hnuaiah tha takin Covid do a ni a, Covid do tura mi inpe tam tak te Prime Minister pawhin a hriat thu leh an chunga a lawm thu a sawi a ni.
Minister hian vawiinah 23 sector, Assam Rifles, Khatlaah hun a hmang ang a, hemi zawh hian Environment & Forest leh State Pollution Control Board bakah FCI, BIS, CWC leh Supply Department hotute a kawmin an hmalaknate a sawipui ang.
Post a Comment