Bungtlang South, November 3, 2022 : Lai Autonomous District Council-a Chief Executive Member Pu V. Zirsanga chuan vawiin, November 3, 2022 khan khuallian niin Bungtlang South-ah Petrol Pump a hawng. 

Bungtlang South Community Hall-a petrol pump 'Lyno Filling Station' hawnna inkhawm neihah Pu V. Zirsanga chuan Tuithlang lam tana petrol pump hmasa ber hawn a ni ta chu lawmawm a tih thu a sawi a. Thawhrimna atanga hlawhtlinna/malsawmna chang tur kan ni a, chu chu a man kan pek dan a zirin a tamin a tlem mai a ni, a ti.

Hmasawnna lo kal zel hian ram pilril leh hmun ṭha pawh a ngaihtuah lova, kan duhthlanna a ni emaw ni lo emaw hmasawnna a thleng mek a, Bungtlang South-ah pawh a thleng mek a ni, a ti a. CEM chuan, khawvelah hian thil ropui inthup a tam em em a, chu chu Pathian hian min haichhuah tir a tum a ni. Chumi tur chuan a man kan pek a ngai a, Amah autute tan chuan thil inthup chu min hawnsak zel dawn a ni, a ti. 

Petrol pum hawnna inkhawm hi Pu LN. Lalhmachhuana, Bungtlang South bialtu MDC chuan a kaihruai a. He hunah hian Khualzahawm Pu Lalzahawma Chinzah, President, MNF District Hqrs; Lawngtlai chuan thu a sawi bawk.

Lyno Filling Station hi January 15, 2019 khan thawh tan a ni a, nuai 70 chuang sen niin, tunah hian petrol leh diesel trip khat ve ve a thleng tawh a. Filling Station hi Bungtlang South khaw tawntirh, PWD Veng, Power House bula awm a ni a, Pu L. Sanalha (Pu LN. Lalhmachhuana Pa) te chhungkaw ta a ni.

Post a Comment

Powered by Blogger.