Lawngtlai, October 31, 2022 : Pu T Zakunga LADC MDC, BJP State Vice President ni bawk chuan “LADC-a MNF Sorkar chuan Mizoram State-a MNF Sorkar aṭangin mipui tana development sum an hmu hleithei ta lo a, State Sorkar hian District Council Sorkar hi a duhsak lo hle tih a lang chiang hle. Heng avang hian vawiina LADC Council hruaitute hi State Sorkar lakah an beidawng ta hle," a ti. 

Vawiin khan Lawngtlai District BJP te chuan Karthar inhlanna leh Political Session neiin, Pu TC. Rorelliana General Secretary, BJP Lai Autonomous District in a kaihruai a, Pu C. Lalneihkhuma Core Committee Member, President Minority Morcha President BJP Lai Autonomous District in hunserh a hmang.

Pu T. Zakunga chuan, NEC atanga Lai Community tana sum rawn kal pawh LADC kutah an dah duhlo a, BADP bakah SEDP leh Central Scheme dangte pawh LADC kutah dah pakhat mah a awm lo. Council budget atang chuan mipui nawlpui chantur sum dah theih a nilo a, hlawh leh hlamah a kal ral deuh vek a. Budget pawnlam atanga duhsakna sum an dawn tlat loh avangin, tun hmaa mirethei leh harsate inpui ni thin kha, tunah chuan Mirethei te pawhin Council Sorkar chu beisei tlakah an ngai ta lo, a ti a. Lairam dinhmun chhe taka awm mek chhanchhuak turin BJP chu an rawn let thuai dawn tih a sawi.

Pu T. Zakunga State BJP Vice President chuan, Pu Zoramthanga CM kaihhruai MNF Sorkar chu Central BJP Sorkar chuan a duhsak hleithei tawhlo a, hei hi hmai hnih neia an khawsak vang a ni, a ti a. PMJVK chungchanga Minister chak tak Pu Robert Romawia Royte hmalakna hi ram mipui hma khawngaihna vang ni lovin, mimal hmingthatna leh hlawkna duhna avanga hmalakna niin a lang. PMJVK Project atang hian mipui nawlpuiin an chhawr phak education, Skill development, Sanitation etc. ah te hian hman ni sela, kan tangkai pui zawk ngei ang. He project an kalpui duhdan atang hian, mirethei te hamthat ve na tur hmuh tur a awmlo hi a lungchhiatthlak takzet a ni. Chuvangin, mirethei te hmangaihtu BJP hi nakkum 2023 inthlanah khian Mizoramah BJP telna Sorkar hi a din ngei a tul a, Mizoram hi dinhmun thaah kan hlang kai ang a, ramnuamah kan siam dawn a ni a ti. 

BJP MDC Pu T. Zakunga chuan BJP ten an buaipui mek 125th Constitutional Amendment Bill 2019 (Sixth Schedule Amendment) chu a hmawr bawk a ni dawn hnai tih a sawi a. 'BJP chuan kan ram dinhmun chhe lutuk hi a vei a, dinhmun tha zawka din tir hi a tum lian ber chu a ni. Chuvangin, Minority te hmangaihtu BJP chuan kan thil beisei mek hi min tihhlawhtlin sak dawn a ni', a ti.

Post a Comment

Powered by Blogger.