Lawngtlai, November 28, 2022 : Ni thum chhung awh tur LADC Winter Session chu vawiin khan LADC Chairman Pu VL Hmuaka kaihhruaina hnuaiah neih tan a ni.
Vawiin session tanniah hian LADC a MDC lo ni tawh boralta Pu A. Liandawla (L) sunna hun hman a ni. Kum 1936 ah Minpui, Tawipuiah a piang a. Kum 1977 ah PC Party ticket-in Diltlang South bialah MDC ah thlan tlin a ni a, Dy. Chairman hna a chelh. July 7, 2022 khan ropuina ramah a chawl.
Vawiin session-ah hian zawhna pathumte chu chhan vek a ni a, Official bill pathum pharh a ni bawk.
Session nikhatna vawiinah hian Pu T. Zakunga, Vawmbuk bialtu MDC zawhna chhangin Sanitation department changtu EM Pu Lalropuia Chinzah chuan, Sanitation Department, LADC in PPP mode a kalpui atangin thlakhat chhunga department sum lakluh zat chu a tlangpuiin 31,785 a ni, a ti a. EM chuan an sum lakluh ang angte hi Taxation Department-ah chhunluh nghal zel a ni, a ti bawk.
Pu LR. Dingliana, AOC bialtu MDC zawhna chhangin, Education department (PS) changtu EM Pu L. Daniala chuan, Primary zirtirtu transfer ten joining report an pe vek tawh tih sawiin, Primary teacher te CEO a dah chungchang zawh belhna chhangin, Pu L. Daniala chuan, officer-te indaihlohna avangin primary teacher te hi CEO a attached thin an nih thu a sawi a, CEO a awm tur hian an pay pawn a pha a ni, a ti.
Pu V. Zirsanga, CEM LADC chuan South Lungpher bialtu MDC Pu H. Lalmuanthanga zawhna chhangin, LADC hnuaiah kum 2022-2023 financial year chhunga regular post hnalak zingah dan lo anga lak an awm lo tih a sawi.
Vawiin session hian bill pathum; The Lai Autonomous District Council (Constitution Conduct of Business etc,) 4th Amendmend Bill, 2022 te, The Lai Autonomous District Council (Education & Human Resource Department, Group B&D Recruitment) 1st Amendment Bill, 2022 te leh The Lai Autonomous District Council (Land Holding & Settlement) 2nd Amendment Act, 2022 te House-ah pharh a ni.
LADC Thlasik thutkhawm hi naktuk, November 29, 2022, Thawhlehniah chhunzawm leh a ni ang.
Post a Comment