Lawngtlai, November 29, 2022 : Lai Autonomous District Council thlasik thutkhawm ni hnihna chu vawiin khan LADC Chairman Pu VL. Hmuaka kaihhruaina hnuaiah neih chhunzawm a ni.
Vawiin session-ah hian zawhna panga chhan vek niin, bill pahnih pass a ni bawk.
Vawiina session hnihnna thutkawmah hian Pu V. Zirsanga, CEM LADC chuan Chandmary bialtu MDC Dr. Lorrain Lalpekliana Chinzah zawhna chhangin, tun dinhmunah LADC hnuaiah Muster Roll (MR) 353 an awm thu sawiin, contract basis in mi 8 chhawr mek an nih thu a sawi a. CEM chuan MR te leh contract basis te hlawhah thla tin cheng nuai 30 vel a kal ral tih a sawi a. CEM chuan ‘kum 2022 - 23 LADC budget-ah MR te leh contract basis te hlawh atan kan invenna tur cheng nuai 50 dah a ni’ a ti.
Vawmbuk bialtu MDC Pu T. Zakunga zawhna chhangin Pu V. Zirsanga, CEM LADC chuan, LADC Golden Jubilee Celebration hmanna tura kum 2021 - 2022 a LADC budget-a dah cheng nuai 10; kum 2022 - 2023 a dah cheng nuai 30, avaiin cheng nuai 40 chu hman zawh a nih thu a sawi a. CEM chuan LADC hnathawkte thawhkhawm atangin Rs. 26,08,217 hmuh a nih thu sawiin, Golden Jubilee lawmnaa sum hman zawng zawng chu Rs. 65,84,018 vel a nih thu a sawi bawk.
LAD changtu EM Pu C. Rongura chuan AOC Veng bialtu MDC Pu LR. Dingliana zawhna chhangin, LADC resolution pass tawh leh budget-ah pawh dah tawh Lawngtlai Master Plan chungchangah tun dinhmunah hmalakna a la awm loh thu sawiin, hmalak tum mek a nih thu a sawi bawk.
South Lungpher bialtu MDC Pu C. Lalmuanthanga zawhna chhangin, Pu V. Zirsanga, CEM LADC chuan, LADC hnuaia pensioner-te pension benefit chu pek kim theih a la ni lo tih sawiin, pensioner mi 42 te la pek kim loh an nih thu a sawi a. CEM chuan, ‘LADC in sumfai kan neih loh avangin state sorkarah kan nghat lo thei lova, state sorkar atangin kan hmu a nih chuan kan inpe kim ang. Tun dinhmunah chuan a kawng a awm rih lo a ni’ a ti bawk.
Chandmary bialtu MDC Dr. Lorrain Lalpekliana Chinzah zawhna chhangin, Social Welfare department changtu EM Pu JB Vanhoy chuan, LADC budget 2022 - 2023 atangin mi 15 hnenah Old Age pension pek a nih thu a sawi.
Vawiin session ah hian Lawngtlai-III bialtu MDC Pu T. Lalengmuana private member resolution, 'Feacal Sludge Treatment Plant hmun tur ram pek vangin Lai Autonomous District Council chuan lawmawm a ti’ tih chu lungrual taka pass a ni. He hmun atana ram petute hnenah LADC hmingin lawmthu sawina pek nise tih a ni bawk.
Vawiin session-ah hian The Lai Autonomous District Council (Constitution Conduct of Business etc,) 4th Amendmend Bill, 2022 leh The Lai Autonomous District Council (Education & Human Resource Department, Group B&D Recruitment) 1st Amendment Bill, 2022 te chu House-ah pass a ni.
Session hi naktuk, November 30, 2022 dar 10:30am ah neih chhunzawm leh tur a ni.
Post a Comment