Siaha, November 25, 2022 : Mara Autonomous District Council (MADC) -a Congress leh MNF intawm sorkar dinglai chu vawiin khan paihthlak a ni.
MADC Session kal lai mek tawp ni vawiinah Pu H. Malvin-a kaihhruai sorkar rintawklohna ‘motion’ chu Zyhno bialtu BJP MDC Pu L. Prisila-a’n a pu lut a. Sawihonaah motion thlawp zawngin Pu M. Laikaw leh Pu K. Hrahmo ten thu an sawi a, motion thlawp lo zawngin CEM Pu H. Malvina leh Dy. CEM Pu HC Lalmalsawma Zasai ten thu an sawi ve thung a. Hemi hnu hian Chairman kaihhruainain ‘secret ballot’ hmangin sorkar hi fiah a ni a. Motion thlawp zawngin vote 15 a tla a, a thlawp lo zawngin vote 9 a tla ve thung a. CEM Pu H. Malvin-a kaihhruai sorkar chu paihthlak a ni ta a ni.
MADC-ah hian seat 25 a awm a; sorkar rintawklohna motion thlawp zawngin vote 15 a tla a, motion thlawp lo zawngin vote 9 a tla a, Chairman erawh neutral vote a ni a. Vote hi Secret Ballot-a thlak a nih avangin motion thlawp zawnga vote-tute hi tu te nge tih chiang taka hriat theih a ni lo.
Kumin May thlaa 12th MADC inthlanpui neihah BJP chuan seat la tam berin, seat 12 an la a, MNF in seat 9 leh INC in seat 4 an la a. Sorkarna siam tura seat lak ngai zat seat 13 la tling an awm loh avangin, MNF leh INC te chuan sorkar intawm an siam a, thla 6 vel an kal hnuah MADC ah sorkar thar a piang dawn ta a, rin danah chuan BJP sorkar thar piang tura ngaih a ni.
Post a Comment