Lawngtlai, November 25, 2022 : Pu H. Biakzaua, Lawngtlai East bialtu MLA, Agriculture Development Board Vice Chairman chuan 'Chief Minister leh Education (Higher & Technical leh School) changtu Minister te'n Mizorama zirnain hma a sawn a, zirna hmunhma leh hmanruate tihchangtlun a nih theih nan theih tawp chhuaha hma lain, zirna lama sawrkar sum sen pawh a tam hle tih a sawi a. GLTC tana hma laknaah pawh PMJVK aṭangin auditorium sakna hmuh tawh leh sak mek niin, project dang ruahmanna pawh kalpui mek a ni' a ti.


Pu H. Biakzaua hian tukin zing khan Lawngtlai East MLA Local Area Development Fund hmanga Government Lawngtlai College (GLTC) Canteen sak thar chu a hawng a. he hunah hian MLA chuan, tun ṭumah pawh MLA Fund cheng nuai nga hmanga GLTC Canteen building ṭha tak sak a ni leh ta chu lawmawm leh chhuanawm a tih thu sawiin, GLTC chu Lawngtlaia zirna sang ber a nih angin NAAC Accreditation hmu tura hma la mek a thawktute chu zirna kawnga ṭan la thar zel tur te, College hmunhma leh hmanrua tihchangtlun kawngah neitu an nih anga ṭhahnemngaihna chhuah zel turin a fuih.

GLTC Canteen building thar hi Lawngtlai East MLA LAD Fund ₹ nuai 5 hmanga sak a ni a. A chhung hi feet 24x24 (square feet 576)-a zau niin, choka hian feet 12x3 (square feet 36)-a zau a awh a. A building-in a luah chin pumpui chu square feet 612 a ni. August ni 22, 2022 aṭanga sak ṭan niin, November ni 15, 2022 khan sak zawh a ni a. A sak hna thawh nan hian ni 46 hun hman a ni.

GLTC Canteen building thar hawnna hun hi College Vice Principal Pu LH Mawia Hnyaloom chuan a kaihruai a. Assistant Professor Pu C. Lalthlamuana'n hunserh hmangin, Assistant Professor Pu J. Lalrinawma hnen aṭangin Canteen building sak hna kalpui dan technical report ngaihthlak a ni a. Associate Professor Pu Mc. Lalrokhuma'n lawm thu sawiin hun a khar a ni.

GLTC Canteen building thar hawnnaah hian ADB Vice Chairman Pu H. Biakzaua hi LADC-a MDC Pu K. Hre Kung leh MNF District Headquarters hruaitute'n an ṭawiawm a. He hunah hian Principal Dr Js. Fanchun hovin GLTC-a zirtirtute leh thawktute an tel a ni.

Post a Comment

Powered by Blogger.