Rauthla, October 23, 2022 : Vawiin, October 23, 2022) khan 1st Inter Schedule Premier Leaque, 2022 Football Tournament final match chu SAI SAG Centre, Titaguri, Kokrajhar-ah a huaihawttu Bodoland Territorial Council leh Lai Autonomous District Council ten an khel a. He hun ah hian Pu H. Lalmuansanga, Dy. Chief Whip, LADC chuan thusawiin, 'he football tournament hian Sixth Schedule hnuaia Tribal awm te thawhhona tha leh in unauna tha min pek ngei ka beisei a ni, a ti.
Pu H. Lalmuansanga chuan, Bodoland Territorial Council te India Hmarchhak a Sixth Schedule hnuaia Tribal awm te tan Pa nih in tling hle a. Thalaite talent phochhuahna mai ni lova, Tribal mipuite inpumkhatna tha zawk kan neih theihna tur bul in tan hi a lawmawm hle a. Hei hian rah duhawm tak a chhuah ngei pawh ka beisei tak zet a ni, a ti.
Bodoland Territorial Council-a, Chief Executive Member Pu Pramod Boro chuan football tournament hmangin India Hmarchhaka Autonomous District Council mipuite kohkhawm an ni chu lawmawm a tih thu a sawi a. 'Hei hian ram leh Hnam tan hmasawnna a thlen ngei ka beisei tak zet a ni,' a ti bawk.
Pu H. Lalmuansanga chuan, India hmar chhaka tribal te hi in unauna tha zawk kan neih zel theihna turin Football chauh ni lo programme dang te pawh ngaihtuah a hun tawh a. Kawng engkim a pa nihna changtu Bodoland Territorial Council a kan hotute'n ngaihtuahna lo seng leh se. Unau kan nihna hi kawng hrang hrangin i vawng nung zel ang u, tiin kalkhawm te a sawm bawk a ni.
1st Inter Sixth Scheduled Councils Football Premier League, 2022 ah hian LADC team hian first match-ah Bodoland Territorial Council chu 1-1 inan inhnehtawk pui a, October ni 14 khan Chakma Autonomous District Council nen inkhelin, 7-0 in hnehna an chang a, October 18, 2022 khan Garo Hills Autonomous District Council nen Group Match hnuhnung ber khelin 5-0 a hnehna changin, Semi Final an lut a ni. Semi Final-ah hian Dima Hasao Autonomous District Council (Assam) nen hun pangngaiah 3-3 inhnehtawkin, Penalty-ah 4-2 hnehna an chang. Final ah hian a thlengtu leh Group match a an lo inhnehtawk pui tawh Bodoland Territorial Council nen inkhelin, goal khatin an vanduai ta a ni.
Post a Comment