Rauthla, October 21, 2022 : Mizo Students’ Union chuan College admission fee leh tuition fee aṭanga zirna in hmasawnna tur atan Budget Allocation hmanga Mizoram Colleges Institution hrang hrangte hman theih tura sorkarin ruahmanna a siam chu lawmawm an tih thu an sawi a. 'Mizo zirlaite zirna bung thar kaipuitu Mizoram sawrkar chungah MSU chuan lawm thu a sawi a ni' an ti.
MSU chuan, kum 2013 aṭang tawh khan zirlaite fee sawrkar revenue-a chhun ṭhin chu tihtawp a nih a, College Development Fund atana hman a nih theih nan rawtna a lo thlen tawh ṭhin a. Ṭhangkhat lian dawn zirlaite’n kan nghah hnua ni October 20, 2022 (Ningani)-a Mizoram sawrkarin college hrang hrangte dinhmun thlir chunga zirlaite fee pek tlingkhawm hman dan tur ruahmanna fel fai tak a siam ta chu Mizoram Education history a chhinchhiah tlak leh zirlaite tan ni pawimawh tak a ni tawh dawn a ni, an ti a. MSU chuan fees tlingkhawm hman dan tur chu a thlithlai reng dawn tih sawiin, College Students’ Union hruaitute chu uluk taka lo en zel turin a chah nghal bawk tih vawiina thuchhuah an siamah an tarlang.
MSU hruaitute chuan vawiin chawhma dar 11:00 khan Governor Pu Hari Babu Kambhampati hmuin Mizo zirlaite’n hamṭhatna tam zawk an dawn theihna tur a thlen a. Mizo zirlaite leh State dang zirlaite nen thawh hona ṭha nei a, cultural exchange nei theih dan turte leh Mizo zirlaite’n tawnhriat tam zawk an neih theih nana State dang Zirna Inte bakah zirna atana pawimawh tur hmun hrang hrangte tlawh theih dan tur kawng te sawi ho niin Governor chuan theihtawp a chhuahpui tur thu MSU hruaitute a hrilh a ni.
Post a Comment