Lawngtlai, October 17, 2022 : Central YLA chuan Dt. 14th October, 2022 Zirtawpni, Rulkual khuaa Electric Line chhia siamtha tura hnatlang vanduaina tawk ta YLA member pathum; Samuel Lalthianghlima (26) S/o C. Lalthawmmawia, Zoramdinpuia (23) S/o C. Lalhmunmawia leh C. Lalrinchhana (18) S/o Singthuama te chunga thihna hial lo thleng chu pawi an tih thu leh mitthi chhungte an tuar pui thu an sawi a. Hliam tuar mi pahnih (2) Lalnghawrliana leh Lalrinenga te pawh dam taka damdawi in an chhuahsan ngei theih nan duhsakna sang ber an hlan tih an sawi.
CYLA chuan hun engemawchen atang tawh khan keini chhim lam leh Lawngtlai District bik hi Electric Power chungchangah harsatna kan tawk fo tawh tih sawiin, Electric Power hrui chat siam tha turin YLA te pawh vawi engemawzat kan lo hnatlang fo tawh thin a ni, an ti a. Electric Department te inthlahdah avangin accident vawi tam tak a thleng tawh tih sawiin, a thawktute bakah Civil mi ten hliampui tuarin, nunna hlu tak pawh an lo chan tawh bawk a ni, an ti.
Central YLA chuan, he chhiat tawhna chungchangah hian sawrkarin Inquiry Commission din sela, he thil thleng chungchangah hian a hma thei ang berin he lai Power Supply Upgradation hnathawk lai atanga, a history te chhuichiangin, he thihna runthlak tak mai lo thleng hi sawrkarin chhui chiangin, Engineering Failure a awmna chhan leh concerned Department atangin mawhphurhtu te hi chhuichhuak sela, an phu tawk hremna an hmuh theih nan hma la ngei rawh se, tiin sawrkar an phut thu an sawi a. He vanduaina avanga nunna chan ta YLA Member pathum (3) te leh hliam tuar mek mi pahnih (2) hi sawrkarin zangnadawmna pe ngei tura an phut thu leh, an beisei thu an sawi bawk.
CYLA in vawiina thuchhuah an siamah, Electric Power chhiat avanga YLA leh khawtlang hnatlangin Department a puih bawm changin mipuite himna ngai pawimawh hmasa ber turin Department te kan phut a, hetianga hmalakna mumal lova hnatlang thawk tur hian Department-in khawtlang pun tawh suh se. He chhiattawhna ang leh Electric Power avanga thihna hial hi thleng nawn tawh lo se tih hi Central YLA chuan a duh a, sawrkar pawhin a tih tur dik tak ti a hmala zui zel turin kan ngen a kan beisei tlat bawk a ni, an ti.
Post a Comment