Rauthla, October 7, 2022 : Mizo National Front chuan central-a tribal scholarship nawr chhuaktu H & TE Minister, Dr. R. Lalthangliana hmalakna chu lawmawm an tiin, Sikul naupang rethei leh harsa ve tak tak, an zir chhunzawm zelna tura scholarship-a innghat tam takte dinhmun ngaihtuah a hmalatu Dr. R. Lalthangliana an chhuang takzet tih an sawi.
Vawiina thuchhuah an siamah MNF chuan, Dr. R. Lalthangliana, Higher & Technical Education Minister chuan chuan tun hnaia New Delhi a zin khan, tribal scholarship Mizoram tana pek chhuah anih thuai theih nan thuneitute a zu dawr a, nasa takin a zu nawr a, an ni pawhin a theih anga ranga hma an lo lak tur thu an hrilh a ni, an ti a. October 4, 2022 khan S.F. Bachagundi, Joint Director, Ministry of Tribal Affairs, Government of India, New Delhi chuan release-na order a tichhuak ta a, vawiin ni October, 2022 hian release-na order chu an rawn thawn thleng a ni, an ti.
Thuchhuaha tarlan a nih danin, he tribal scholarship Mizoram tana central-in a pek chhuah hi nikum 2021-2022 atan third instalment Rs.794.84030 lakhs leh kumin kum kal lai 2022-2023 atan central share atangin 50%, Rs.1823.89455 lakhs, a vaiin Rs.2590.31485 lakhs an release a ni.
Dr. R. Lalthangliana, Health Minister department-ah tun hnaiah Mizoram State Health Care Scheme hnuaia bill tang cheng vbc 4 zet release a nih hnuah, Chief Minister zahawm tak Pu Zoramthanga remtihnain, vawiin khan SEDP fund atangin department lamin cheng vbc. 20 zet pek chhuah leh mai theih tura phalna tihfel mek a ni hi Chief Minister Pu Zoramthanga leh Health Minister Dr. R. Lalthangliana chungah MNF chu a lawm hle a ni, tiin thuchhuah an siam.
Post a Comment