Rauthla, October 7, 2022 : Mizoram Pradesh Congress Committee chuan October 4, 2022 atang khawchhak tlang dung an fan chu vawiinah an zawh fel thu an sawi a, hetih chhung hian MPCC President Pu Lalsawta'n Congress Party zawm thar Saitualah voter 249, Khawzawlah voter 134 leh Champhaiah voter 386, a vaiin voter 769 a lawmlut niin an sawi.
Vawiina MPCC in thuchhuah an siam danin, he Khawchhak Tlangdung Fan Programme-ah hian District pathum - Saitual District, Khawzawl District leh Champhai District-te tlawh a ni a. Vawiin khan East Tuipui leh Hrangturzo bial khaw thenkhat tlawh a ni bawk. Heng District pathumahte hian vantlang inkhawm lian tak tak buatsaih thin a ni.
Pu Lal Thanhawla a chawlh hnua MPCC Office Bearer tharten Mizoram a District hrang hrang 11 an tlawh chhuak tih sawiin, Saitual Programme a tel, ADCC Organiser Pu Lalrinawma, Armed Veng, motor accident a a boral chu pawi an tiin an ui takzet thu an sawi bawk.
MPCC chuan he Programme hmang hian Mizoram mipui tam takin Congress Party-ah beiseina thar an neih ngei an beisei thu an sawi.
MPCC in khawchhak tlangdung an fannaah hian Elected Office Bearer pathum - Pu Lalsawta, President, Pu Lal Thanzara, Vice President leh Pu Zodintluanga Ralte, MLA & Treasurer, MPCC te an tel tluanchhuak thei a. Aizawl atangin Party hruaitu mi 60 vel an tel tluan thei bawk.
Post a Comment