Rauthla, September 5, 2022 : Vawiin khan B. Rozamliana (29) s/o B. Lalhmingliana, Tui Ferry chu an Balu la chesualin Tuipui Ferry chhak, Thliarpui leh Thliarte inkar, Lungkang suara tla a, a ruang hi zawn mek a ni a, tun dinhmunah hmuh a la ni lo.
Tuipui Ferry MTP hruaitute sawi danin, B. Rozamliana leh Speedboat neitu Zathanga chu vawiin dar 9:00am khan Tuipui Ferry chhak Thliarpui lamah Balu la turin an kal a, an chhuk lamah Speedboat hi a nung thei lova, tuiin Speedboat a len thlak zel avangin lawng khalhtu B. Rozamliana chuan Zathanga chu zuangthla turin a ti a. Zathanga hian lawng chu vuan mahse, a vawn rei theih loh avangin a thlah a. Lawng chu tuiin len thla zelin Lungkang suar thlen hma deuhah B. Rozamliana hi a zuang thla ta a ni. Lawng ruak hi Suartharah Balu la hoin a lo man a ni.
Chetsualna an thleng tih an hriat veleh Tuipui Ferry MTP hruaitute hi chetsualna lamah thawkchhuak nghalin, a tlakna lai awmah an dap nghal a, chanchin buatsaih lai hian a ruang hi la hmuh a ni lova. Zanin hian a tlakna lai vel hmun liah MTP member mi 40 chu an riak dawn bawk a ni.
A ruang hi zaninah hmuh a ni loh chuan naktukah la zawn chhunzawm zel tur a ni a. Ruang zawn hna hi naktuk hian Council Veng VC leh YLA Council Veng Branch te ruahmannain Council Veng Thalai ten an thawhpui dawn a ni.
Chhiat tawhna hmun hi CYLA hruaitute pawh thleng thla nghalin tanpuina awm thei engemawzat an pe a, YLA Council Veng Branch hruaitute pawh a hmunah kalin tanpuina an pe bawk.
Post a Comment