Lawngtlai, September 5, 2022 : Pu V. Zirsanga, CEM LADC chuan vawiin Teachers' Day-ah hian zirtirtute zawng zawng chibai bukin, ram leh hna, khawtlang leh mihring nun siam tha a, tihpuitlin a nih theih nana an thawhrimna zawng zawng chungah lawmthu a sawi bawk.
CEM chuan zirtirtu ropui leh hmathlir thui, zirna ngai paiwmawh India ram President leh Vice President hlui Dr. Sarvepalli Radhakrishnan zahna chibai a buk a, amah avanga vawiinni hi lawm leh hmang thei kan ni a ti.
Pu V. Zirsanga chuan khawvel hmasawnna zawng zawng bul chu zirtirtute avang a ni tih hi lungrual taka kan pawm tlan theih awmchhun a ni a ti a. Zirtirna inkhaidiat chhoah, Elementary stage atanga Higher, College, University leh Education Institution hrang hrang ten zirtirna kan pek dan leh kan pek chin (Curriculums/Course/ Syllabus) te inang lo mahse, zirtirtu zawng zawng ten an tum chu naupangte chu putilinga siam leh, hriatna leh thiamna pek a ni a ti.
Zirtirnaah hian hahthlak bik leh pawimawh bik, hniam bik leh sang bik a awm loh thu sawiin, inthlahdah theih a nih loh thu a sawi a. Zirtirtute chu Pre-school atanga University thlenga mihring tipuitlinga, hmantlaka chherchhuaktu an ni tih hre reng chunga, an rawngbawlna leh an eizawnna rinawm taka thawk zel turin a chah a ni.
Post a Comment