Lawngtlai, September 6, 2022 : Lawngtlai District Level Committee on Myanmar Refugees chuan kar liam taa Myanmar Army leh Arakan Army te inkah avanga sahimna zawnga lo tlan lut thar Myanmar mite chu awm lailawkna hmun tur bekte (temporary shelter) zar nan silpauline pek ni se, an ti a. District Administration atangin blanket, commode, hygiene kit leh mamawh dangte pek tum a ni bawk a. Raltlan chhawmdawlna atana State atanga fund dil chu Home Department-ah bawhzui ni se, an ti.

Lawngtlai District Level Committee on Myanmar Refugees nimin khan an chairman Lawngtlai Bawrhsap Pu Amol Srivastava hovin Lawngtlai DC Conference Hall-ah an thukhawm a. Meeting-ah hian August ni 31, 2022 atanga Lawngtlai District dep ramri hnaih, Myanmar ram chhung Varang leh a chhehvela Myanmar Army leh Arakan Army te an inkah avanga Lawngtlai District chhunga Myanmar raltlan lo lut thar chu 589 an nih thu leh Raltlan lo lut tharte hi Zochachhuahah mi 115, Hmawngbuchhuahah mi 210, Laitlangah mi 127 leh Dumzautlangah mi 137 an awm an awm thu leh Community Hall leh in remchanga an inkulh bakah, khawtual mite'n a tul danin an lo mikhual thu tarlan a ni a. Tun dinhmunah Lawngtlai District chhungah Myanmar atanga raltlan lo lut mi 5,909 chhinchhiah tawh an ni bawk.

Nimin meeting chuan Raltlan nei thar khuate chu a tul anga chhawmdawlna pe turin ruahmanna an siam a. Medical check up chungchangah a tul leh mamawh dan azirin Doctors Without Borders te nena thawk hova hma lak tum a ni. 

Post a Comment

Powered by Blogger.