Rauthla, September 21, 2022 : United Pentecostal Church of North East India leh Mizoram UPC te inkara kum 27 chhung zet thubuai awm chu September ni 7, 2022 khan India ram rorelna sang Supreme Court chuan a ching fel ta.
United Pentecostal Church of North East India leh Mizoram UPC te inkara thubuai, Gauhati High Court-in thuremna a tihchhuah chungchanga lungawi lova Mizoram UPC ten Supreme Court a Special Leave petition (SLP) an thehluh chu ngaihtuahin September 7, 2022 Nilaini khan Supreme Court chuan Mizoram UPC te chu thiam loh chantirin, an SLP thehluh chu a hnawl (dismissed) sak. Supreme court chuan, "Mizoram UPC ten UPC NEI kohhrana an awmho laia an bungrua, kohhran an chhuahsan tawh hnua an chuh hi a dik lo va, kum 1995-ah UPC NEI kohhran hi an chhuahsan avangin kum 1995 leh a hma lama UPC kohhran bungruate hi UPC Mizoram te hian engmah chuh theihna (right) an nei lo, tia Gauhati High Court-in judgment order a siam chungchangah hian tih dik loh engmah a nei lo va, chuvangin SLP an dilna hi pawm (entertain) theih a ni lo va, hnawl (dismissed) a ni," tiin High Court thuremna hi a pawm.
Heti a lo nih takah chuan UPC kohhran an buai avanga Biak in leh bungraw chi hrang hrang Mizoram UPC lam kuta la awmte chu UPC NEI lam kuta an hlan vek a ngai dawn ta a ni.
Supreme Court order bawhzui hian UPC NEI North Mizoram District chuan an District chhunga bungrua chinfel dan tur ngaihtuahin September 13 khan meeting neiin kum 1995 leh a hma lama UPC- NEI Property zawng zawng an kuta hlan a nih theihna turin hmalakna an kalpui mek a. An hmun hma anmahni kuta la awm lote chu an kuta hlan tawh turin a luahtute pawh hriattirna an pe tawh a ni.
Hetih mek lai hian UPC NEI rorelna sang ber, Executive Board chuan UPC NEI chhuahsana pawl danga lo awm tawh zawng zawngte leh Mizoram UPC te chu an hmun ngai, UPC NEI-ah kir leh vek turin an sawm a, December 2022 ral hmaa lokir leh te chu rawngbawlna kawnga an dinhmun pangngai ah theuh an lo kuangkuah theuh turin an inhriattir tawh a ni.
Post a Comment