Rauthla, September 6, 2022 : Nimin Teachers' Day pualin President Draupadi Murmu chuan zirtirtu tha mi 46 thlanchhuahte hnenah chawimawina a hlan.

Union Ministry of Educatioin hnuaia Department of School Education and Literacy chuan nimin Teachers Day pual hian inkhawm a buatsaih a, he hunah hian National Teachers Award hi zirtirtu mi 46 hnenah sem a ni . President Draupadi Murmu-i chuan mahni hnam tawng ngeia zirna kalpui chu Science, thu leh hla leh Social Science lama zirlaite theihna talent hmuhchhuahtirtu a ni tih sawiin National Education Policy 2020 pawhin mahni hnam tawng ngeia lehkhazir chu a ngaipawimawh ber a ni a ti a. Tunlai khawvelah chuan ngaihtuahna thar leh zirbingna te a pawimawh em em a, hei vang hian zirtirtute pawhin an zirlaite thil ngaihtuah thukna lamah an kaihhruai a ngai a ti a. Zirtirtute chu India ram zirna hnuk chelhtute an ni a, sikul nuai 15 chuanga zirlai vaibelchhe 26 chuangte hnenah zirtirtu nuai 97 chuangten hriatna an pe mek a ni a ti bawk.

National Teachers Award dawng turte hi lang tlang takin internet kaltlangin chhawng thuma thlitfim hnuah thlan chhuah an ni. National Teachers Award hian a tum ber chu ram tana zirtirtute hnathawh ropui tak hriatpui leh an inpekna avanga zirlaite nuna hmasawnna tam tak avanga zahna lantirte a ni. 

Post a Comment

Powered by Blogger.