Lawngtlai, September 02, 2022 : Lawngtlai East Bialtu MLA, Agriculture Development Board Vice Chairman Pu H. Biakzaua chuan nimin khan NEC sum hmanga nuai 466.62 senga sak Lai Cultural Centre-cum-Auditorium chu a hawng. LCCA hi Lawngtlai - III ah a awm a ni.
Mizoram Sawrkara Art & Culture Department Director Pu R. Hmingthanzuala'n kaihruai hawnna inkhawmah Pu H. Biakzaua chuan Lai Cultural Centre-cum-Auditorium din a nih theih nana a tira hma la hmasatu Bialtu MLA hlui Pu H. Zothangliana te, DPR siamtu Lushai Engineers te, Lawngtlai-III Branch YLA, VC leh mimal thahnem ngai tak takte hmalakna fakin lawmthu a sawi a, a hlawhtlin nana theih tawp chhuahpuia tun dinhmun thlentu Mizoram Sawrkar fawng vuantute, Art & Culture Department official-te leh Lai Autonomous District Council hotute chungah lawm thu a sawi bawk.
Pu H. Biakzaua chuan, LCCA hawn tak chu Cultural Centre a nih ang ngeia hnam ziarang humhalhna leh chawi nun nana tangkai taka hman a nih ka beisei a ti a, kawng hrang hranga Lawngtlai District thalaite rahbi thar chuan kaitirtu a nih ka beisei a ti bawk. Sum tam tak senga ram leh hnam tana ro tling ni tura din a nih angin, a enkawltu leh hmangtu turte pawh uluk leh dimdawih taka enkawl leh hmang turin a chah a ni.
LCCA hi NEC atanga sum hmuh hmangin t nuai 466.62 senga sak a ni a. A hna hi Mizoram Sawrkar Art & Culture Department-in enkawlin, Lushai Engineers, Ramhlun, Aizawl te'n a sak hna an thawk a. February 15, 2018 khan hna tan niin, April 20, 2022 khan thawh zawh a ni. A building hi chhawng thum niin, a kawng ân (ground floor) hi square metre 147.68-a zau a ni a; a chhawng laita (1st floor) hi square metre 327.50-a zau niin, exhibition hall, conference room, pre-function lobby leh toilet te dah a ni a; a chhawng chung ber (2nd floor) hi square metre 575.11-a zau niin, hall leh seating gallery atana ruahman a ni a, ladies & gents toilet dah tel a ni bawk.
Art & Culture Department hotute sawi danin, Department kal tlang hian Aizawl lamah Vaivakawnah leh Bawngkawnah te Cultural Centre-cum-Auditorium hi sak a ni tawh a, tuna Lawngtlai-III-a mi hi Mizorama a pathumna a ni. LCCA chungchangah hian Department leh Lawngtlai-III Branch YLA te'n inremsiamna (agreement) ziakin, Lawngtlai-III Branch YLA te hian an enkawl zui dawn a ni.
Post a Comment