Rauthla, August 31, 2022 : Nimin khan Chief Minister Pu Zoramthanga hovin Council of Ministers chuan Mizoram sorkar department thenkhat atanga sawrkar inrelbawlna tura thu pawimawh chhawpchhuah rel zingah Mizoram chhunga kuthnathawktute grep thar atanga Dan hnuaia wine siam leh hralh phalsakte leh Department hrang hranga Contract Employee te hnena 10% Dearness Allowance pek a remtihte chu a langsar zualte a ni.
Nimin meeting-ah hianThe Mizoram Liquor (Prohibition) Draft Rules, 2022 chu ngaihtuahin, zu zawrh khapna dan chu khawng taka kalpui a nih zel tur thu leh Samagra Shiksha hnuaia zirtirtu mi 5000 dawn hun rei tak hlawh pung miahlo a an thawk chu an dinhmum siamthat sak an nih tur thu leh DA 15% leh Medical Allowance bakah an thawh rei dan azirin allowance pek remtih a ni.
Cabinet meeting chuan infiammi, ram chhung leh ram pawn inelnaa hlawhtlinna changte tana Mizoram Sports Incentive Cash Award Scheme 2022 phawrh chu a chhunga inkaihhruaina hrang hrangte zirho in pawm a ni.
Ramri luhkhaa Immigration check post din tura chak taka hma a lak mek naah Zokhawthar, Kawrpuichhuah leh Zorinpui Immigration Check Post-ah Mizoram Police tan post 20 siam belh remtih a ni.
Home Department hnuaiah vek hian Head Constable (Operator) post 34 chu MPRO, Mizoram Police hnuaia Assistant Sub Inspector (Operator) a hlankai vawiin Cabinet meeting chuan a remti a ni.
Planning & Programme Implementation Department Mizoram Startup Mission (Government Society) din tura rawtna a thlen chu ngaihtuah ho a ni bawk a. Thalai tam tak tan eizawnna ruahman sakna tur tha tak a nih theih dan tur sawihovin, he rawtna hi pawm a ni.
Post a Comment