Lawngtlai, September 02, 2022 : Lawngtlai East bialtu MLA, Agriculture Development Board Vice Chairman Pu H. Biakzaua chuan nimin zing khan Lawngtlai Electric Venga Community Health Clinic Centre sak thar a hawng.
Lawngtlai Chief Medical Officer Dr LP Malsawma kaihruai Health Clinic Centre thar hawnnaah hian Pu H. Biakzaua chuan, Chief Minister leh Health Minister te'n hriselna ngai pawimawhin, hriselna kawnga district hnufual Lawngtlai District-ah health sector lam tihchangtlun a nih theih nan theihtawp chhuahin hma an la tih sawiin, sorkarin Lawngtlai East bialah Community Health Clinic Centre 11 hawn remtih a nih hnuah, building awm sa hmun thum tih loh, hmun riatah MLA Fund hmangin building sak a ni a ti a. tun hnai lawk khan Lawngtlai-III leh Lungtian-II-ah Centre dah a remtih leh thu sawiin, Lawngtlai West bial lamah pawh hma lakna kalpui mek a ni, a ti a. Pu H. Biakzaua chuan Centre hawn tawhahte MLA Fund hmangin thawktu rawih a nih thu sawiin, tun hnai khan Sawrkar chuan Centre-a thawktute hlawh tumsak a remti tawh tih thu a sawi bawk.
Lawngtlai Electric Venga Community Health Clinic Centre hi MLA Local Area Development Fund cheng nuai 4 senga sak a ni a. Electric Veng Village Council ten a sak hna an thawk.
Nimin zing vek khan Pu H. Biakzaua chuan District TB Centre, Lawngtlai tana X-Ray khawl bunna tur hmun a en a. Lawngtlai East bialtu MLA hian District TB Centre Lawngtlai tan X-Ray dahna tur saksak a tum thu a sawi a. Tuna District Hospital Lawngtlaia TB Centre building bul chiahah X-Ray dahna tur hi sak ni se, tiin an ruahman a ni.
Post a Comment