Lawngtlai, September 6, 2022 : Nimin khan Lawngtlai Bawrhsap Pu Amol Srivastava chuan Government Lawngtlai College tlawhin, Principal leh zirtirtute duhsakna chibai a buk a, zirtirtute pawimawhna tar lan nan leh zirtir hna a dah sanzia lantir nan 1st Semester zirlaiho hmaah class a la.
He hunah hian subject hrang hrang zirlai mi 150 kalkhawmte chu Bawrhsap chuan “Emotional Intelligence and its importance in Life” tih thupui hmangin zirtirna a pe a. Zirlaite chu emotional skill leh intellectual skill neih kawp tum tura fuihin, hlawhtlinna chang turin thinlung leh thluak hman a ngaih hun thliar thiam a pawimawh tih a sawi.
Bawrhsap chuan, mahni rilru leh châkna thunun theih loh vang (emotional skill neih that loh vang)-in thalai tam tak zu leh ruihhlo bawihah an tang mek a. Mi dang nena inlaichinna tha nei tur te, miin hruaitu ena an en ni tur te leh mi hlawhtling ni tur te'n emotional skill tha tak neih a pawimawh a ni’ a ti.
Zawhna leh chhanna hun hman zui niin, zirlaite'n hringnun, eizawnna, tui zawng leh hlawhtlinna chungchangah te zawhna chi hrang hrang an zawh chu Bawrhsap hian a chhang a ni.
Zirlai kalkhawmte chuan an zirtirtute duhsakna chibai bukin, zirtirtute zah turin an intiam a ni.
Post a Comment