Lawngtlai, September 6, 2022 : Nimin khan District Institute of Education and Training, Lawngtlai chuan Graduation Day (Class of 2022) leh Felicitation Ceremony neiin Mizorama DIET Topper Lalrammawii D/o chawimawina hun hman a ni a. He hunah hian Pu V. Zirsanga, Chief Executive Member LADC chu khuallian a ni.
Pu V. Zirsanga chuan, Lawngtlaiin DIET kan neih atang hian Mizoram puma lang phak naupang result tha tak tak an awm thin chu lawmawm a tih thu a sawi a. Hei hian DIET a thawkte inpekna leh thawhrimna rah a ni tih a chiang hle a. Chuvangin, zirlaite pawhin thawhrimna tel lo chuan hlawhtlinna a awm thei lo a ni tih hria ila. Zirtirtute thawhrim ang chiah a naupangin a thawhrim ve loh huan result tha tak a neih theih loh a ti a. DIET Lawngtlai pawhin result tha an neih thin nachhan chu zirtirtu leh naupangte thawhrimna rah a ni a, he thawhrimna hi zirtirtute leh zirlai ten nei reng turin a chah bawk a ni.
LADC in zirtirtu a lak dang kalphung thlak a nih tawh thu sawiin, Pu V. Zirsanga chuan, tun hma kha chuan LADC hnuaia zirtirtute pawh politician hmelhriat nei tha deuh te lak an ni thin a. Mithiam tam tak te chu zirtirnaah tui in chak hle mai se, duhsaktu an neih loh avangin an tan kawng a bo em em a ni. Chutiang te avang chuan kan zirna in nasa takin a tuar a ni, a ti a. Tunah chuan sawrkar pawhin mithiam tak tak ten teaching profession in luh theih nan leh kan naupangte zirtirtu tha zawk an nei a, zirna tha an neih thei nan, Recruitment Rules thar buatsaih in Written leh interview hmang te in zirtirtu lak an ni tawh a, mithiam duhsaktu nei ve lo te tan pawh kawng a in hawng tan mek a ni, a ti bawk.
Hemi hnu hian Pu V. Zirsanga chuan, MBSE hnuaia Dl.El.Ed exam 2022 a topper Lalrammawii hnenah lawmpuina thuziak a hlan nghal a ni.
DIET Lawngtlai hian Kum 2016 atangin Pre service nei tanin tun hi a batch ngana niin, kum 2021 atang khan Mizoram Board of School Education chuan ranking siam tanin, kum 2021 khan Top 7-ah Lalenmawii, Electric Veng chu a lo lang tawh a. Kumin hian Mizoram topper Lalrammawii, Cheural khua niin subject 11 ah mark hmu sangber nihna a hauh bawk a ni.
Pi Ngurhmingliani DIET Principle chuan, DIET a training te hi theihtawp chhuahin kan hrual a. Chuvangin, LADC a zirtirtu tha ber an nih ngei pawh kan beisei a ni, a ti a. Zirlai zirtirna a tui mi eng emaw zat kan nei a. Hei hi kan ram hruaitute hian min hriat sak a, kan ram zirna hmasawnna tur atan DIET Lawngtlaia zirchhuak te hian tangkaina nasa takin an ngei dawn a ni, a ti bawk.
Post a Comment