Lawngtlai, September 6, 2022 : Fa tir paite tana hamthatna dawn theihna ‘Pradhan Mantri Matru Vandana Saptah’ chu nimin khan Lawngtlai District tan Addl. DC Pu James Miahlungin a hawng.
Additional DC Pu James Miahlung chuan Lawngtlai District chuan kawng hrang hrangah hmasawnna tur a la ngahzia sawiin, ICDS staff te, anganwadi worker leh helper te chu an theih ang tawka hma la chhunzawm zel turin a fuih a. He Saptah hman chhung hian beneficiary a tam thei ang ber neih tum tur leh daily activity ruahman sa tha taka zawma hma la turin a chah a ni.
He scheme hi fa tir paite tana hamthatna Rs. 5,000/- dawn theihna a ni a. Mizoramah chuan kum 2017 atanga tan niin, Lawngtlai Disrtrict bikah chuan he hamthatna hi mi 2,454-in an dawng tawh a ni. Saptah hman a nih chhan ber chu mi tam zawkin he scheme hi an lo hriat lar a, beneficiary tam thei ang ber an awm theih nan a ni.
PMMVY Saptah hi September ni 12 thleng hman tur a ni a. Hun hman chhunga thawk tha ber anganwadi worker te hnenah lawmman pek a ni bawk ang.
He hun hi District Programme Co-ordinator (PMMVY) Pi F. Lalengvari'n kaihruaiin, kal khawmte lawmna thu a sawi a. PMMVY Scheme chanchin tlangpui a sawi fiah bawk a. Zawhna leh chhanna hun hman ni bawkin, hlawk tlang taka hun hman a ni.
Post a Comment