Lawngtlai, September 23, 2022 : Tun hnaia Mizoram Sawrkarin Lawngtlai khawpui tana Auto Rickshaw Permit 68 pek chhuah leh a tum chu an duh loh thu tarlangin, a tawp thlenga dodal an tum tih Lawngtlai Auto Rickshaw Owners Association chuan an sawi.
Lawngtlai Auto Rickshaw Owners Association nimin khan Press Club, Lawngtlai thuthar thehdarhtute kawmin, an President B. Hmingchungnunga chuan, tunah hian Lawngtlai khawpui chhungah Auto Rickshaw Service lai 400 chuang hret a awm a, heng Auto Rickshaw te hi Stand 4 siamah chep taka an din thin thu te, Stand a dinglo, an member ni lo khawlaia Passenger zawng a tlan kual an awm reng thu a sawi a a, hetianga Stand-ah pawh an len tawh loh lai a, Sorkarin Permit pek chhuah a tum hi thil tih chi ah an ngaih loh thu a sawi bawk.
LAROA President chuan, kum 2020 ah khan Lawngtlai East Bialtu MLA Pu H. Biakzaua hnenah Lawngtlai khawpui tan Auto Rickshaw Permit pek belh tawh lo tura an lo ngen tawh thu te, MLA in an harsatna sawite pawh thiltih awm tak a nih thu sawi a, ngaihtha taka an awm laiin, tun tum hi MLA hnena an ngen hnuah vawi thum Auto Rickshaw Permit an Issue na anih tawh thu a sawi bawk.
LAROA Secretary T. Lalkhawngaihsanga chuan thuthar thehdarhtute zawhna chhangin, Sorkarin Auto Rickshaw Permit an pek tur an tihfel vek tawh, Lawngtlai khawpui chhung bik a mi 68 lai a thlan chhuahte hnena Permit hi a pe lui a nih chuan a tawp thlenga dodal an tum thu sawilangin, an hmalak dan tur erawh chu Sorkar thuchhuak a zir a la ngaihtuah a nih tur thu a sawi.
B. Hmingchungnunga President chuan, sorkarin permit pek chhuah a tum hi pe chhuak rih lo turin an ngen tih a sawi a, tun atanga kum 5 thleng tal chu Permit thar hi pe chhuak lo turin Sorkar an ngen tih a sawi.
Post a Comment