Bungtlang South, September 23, 2022 : Nimin khan Western Village Council Assoction conference vawi-1 na chu Bungtlang'S' Community Hall ah hman a ni a, Pu V. Zirsanga CEM, LADC chuan Khuallian niin a hmanpui.

Pu J. Lalrinmuana, Chairman, WVCA kaihhruaia hun hmanna ah Khuallian Pu V. Zirsanga chuan, rorelna hi nghet taka kalpui kan duh avangin VC te hi suspension a dah che u hi kan tum lo. LADC zahawmna a nih theih nan VC kalpuina chungchangah Court a kal kher ngai tawhlo turin ruahmanna kan siam dawn a ni a ti a. VC te chuan dan mumal tak hmangin hmasawnna min thlen sak rawh u, a ti bawk.

Pu V. Zirsanga chuan, he Pawl hian kawng hrang hrangin hmasawnna lo thlen sela, khawtlang leh midangte tanpuitu pawl lo ni se, he pawl ah hian hruaitute chauh niloin VC members zawng zawng ten mawhphurhna in nei tih in hriat ka duh a, khawtlang hmasawnna hna thawk turin NGO te leh Kohhran te thawhpui thiam thin turin leh khawtlangah thawhhona tha a awm theih nan hma la thin turin a chah bawk.

LDVCA President Pu V. Lalramnghaka chuan, Bungtlang'S' RD Block-a VCs te hi Lawngtlai District-a RD Block dangte entawn tlak ni thei tura hnathawk tura chah in, LADC-Sorkar-in VC te chenna in emaw in luahlai te House Tax awl phalsak an nih tak avangin LADC-Sorkar, Pu V. Zirsanga kaihhruai leh LAD changtu EM te chungah lawmthu a sawi bawk.

Western Village Council Association Conference 2022 ah hian resolution pahnih; Bungtlang South Police Outpost chu Station puitlingah hlankai nise rawh se tih leh Bungtlang South PHC hi CHC ah sorkarin min hlankai sak rawh se tih te an passed a ni.

Nimina hun hman hi session hnih a kalpui niin, session hnihnaah hian Kum 2022-2024 chhunga Hruaitu tur thlanna neih nghal niin, heng mite hi Hruaitu thar atana thlanchhuah te an ni. President - J. Lalrinmuana, Vice President - Lalvensanga, Secretary - Liankunga, Asst. Secretary - Sawitomoni, Finance Secretary - V. Saprema, Treasurer - Happymarry

Western Village Council Association conference ah hian Bungtlang'S' Bialtu MDC Pu LN Lalhmachhuana, Pu C. Rongura EM LAD bakah Pu Lalzahawma Chinzah, President, MNF District Headquarters, Lawngtlai ten thusawina an nei a, Pi HappyMarry, Treasurer WVCA-in lawmthu sawi in hun tihtawp a ni.

Tun dinhmunah Western Village Council Association ah hian MDC bial pariat (8) atangin Village Council-51 leh Sub-Village Pahnih (2) an awm mek a ni.

 

Post a Comment

Powered by Blogger.