Lawngtlai, September 28, 2022 : Excise & Narcotics changtu Minister Dr K. Beichhua chuan vawiin khan  Government Lawngtlai College Hall-ah Sorkar laipuiin ram pum huap ruihhlo do beihpui thlak a kalpui tur, "Nasha Mukt Bharat Abhiyaan 2.0" a hawng.

Lawngtlai Additional Deputy Commissioner Pu James Miahlung kaihhruai hawnna inkhawmah hian Dr K. Beichhua chuan Mizoram chhunga hman khawloh theih ruihhlo (drug) hluarna - Lunglei, Lawngtlai leh Mamit-ah te he ruihhlo do beihpui thlak hi chak taka kalpui a nih tur thu a sawi a, heng district khawpuiah te hian Bawrhsap chairman-na hnuaiah Ruihhlo Do Committee din vek a nih tur thu sawiin, Committee-ah chuan official-te bakah, tlawmngai pawl hrang hrang leh kohhran ai awhte an tel tur thu a sawi. Nasha Mukt Bharat Abhiyaan chu kum 2021-ah sokar laipuiin a kalpui tawh thu a sawi bawk.

Dr K. Beichhua chuan, Mizoramah drug a hluar avangin ṭhalai zingah HIV/AIDS vei an pung nasa hle a, heti taka kan rama chhiatna hlir rawn thlentu ruihhlo do tur hian kan zavaia kan ṭan tlan a ngai a ni, a ti a. Mipuite'n ruihhlo zuar kan hriat a, thuneitute hnena kan report hian nasa takin hna thawktute kan ṭanpui a, ram tan hna ṭangkai tak kan thawk a ni, a ti bawk.

Lai Autonomous District Council (LADC)-a Chief Executive Member Pu V. Zirsanga chuan, LADC huam chhungah ṭhalaite nun tichhe tura ruihhlo la lut man an nih chuan na taka chhan let an ni dawn tih a sawi a. 'Ruihhlo hluarna apiangah nun a ralmuang lo va, ruk ruk leh tualthah a tam ṭhin, a ti.

He hunah hian Excise & Narcotics Station, Lawngtlaia Officer-in-Charge Pu Lalrengpuia chuan, kum 2019 November thla aṭanga kumin 2022 September thla thlengin Lawngtlaiah ruihhlo avanga case register 420 a awm tawh thu a tarlang a. Tun dinhmunah ruihhlo chi khat, No. 4 chu Lawngtlai khawpuiah buaipui tham awma an hriat thu a tar lang bawk.

Vawiin hun hmanah hian LADC-a EM leh MDC-te bakah, Sawrkar official-te, political party hruaitute leh tlawmngai pawl hruaitute an tel a ni.

Post a Comment

Powered by Blogger.