Lawngtlai, September 9, 2022 : September 5, 2022 a Thliarpui leh Thliarte inkara chesual Tuipui Ferry khua, B. Rozamliana ruang zawn hna chu MTP Tuipui Ferry te pui turin CYLA ruahmanna angin kalpui mek zel a ni a. Vawiin khan Lawngtlai YLA Town Branch atangin YLA Chandmary Branch, YLA Chawnhu Branch leh YLA Thingkah Branch ten tuitla zawngin member thahnem tak an thawkchhuak.
YLA Chawnhu Branch-in Tuipui Ferry MTP te hnenah Dal bag 1, Alu Bag 1, Diesel Litre 20 an hlan a, YLA Chandmary Branch ten ralna Rs. 3,000 an hlan bawk a. YLA Thingkah Branch ten Pathianniah tanpuina hlan tura kal leh an tum bawk.
Vawiin ruang zawnnaah hian Pu VL. Hmuaka, Chairman LADC leh a thawhpuite a hmunah kalin tanpuina Diesel 40 litre leh Buhfai Bag 2 leh ralna pawisa fai engemaw zat an hlan a. Heng tanpuina te hi MTP Tuipui Ferry te hnenah hlan a ni.
CYLA hruaitute hnena atanga thudawn danin, vawiin hi ruang zawn ni 5-na a ni a, tui lian in tlem tlemin kam lam a pan hret hret a, vaukam lam hrutin ruang zawn hna thawh mek zel a ni a, hmasawnna erawh a la awm lo. Vawiin, September 9, 2022 hian YLA Hruitezawl Branch leh YLA Tuidangchhuah Branch te pawhin Lungmawi chhak lipui vel a ruang an hmuh fo na thin an vil a, theih tawp an chhuah mek bawk.
Naktuk, September 10, 2022 hian ruang zawn pui tur in Town Branch atangin YLA Electric Veng Branch, YLA L-III Branch leh YLA Council Veng Branch te an thawkchhuak ve leh dawn a ni.
Post a Comment