Lawngtlai, September 10, 2022 : September 5, 2022 a Thliarpui leh Thliarte inkara chesual Tuipui Ferry khua, B. Rozamliana ruang zawn hna chu MTP Tuipui Ferry te pui turin CYLA ruahmanna angin kalpui mek zel a ni a. Vawiin khan Lawngtlai Town Branch atangin YLA Council Veng Branch, YLA L-III Branch leh YLA Electric Veng Branch te tuitla zawngin member thahnem tak an thawkchhuak.
YLA Council Veng Branch te leh Council Veng VC ten Tuipui Ferry MTP te hnenah Buhfai Bag 1, Dal Bag 1, Squash Case 2, Frooti Case 5, Torch Light Battery Box 1, Silpaulin 1, Tel Case 2, Mortain Box 20, Diesel Litre 20 an hlan a. YLA L-III Branch hian ralna sum Rs. 2,000 an hlan a, YLA Electric Veng Branch ten Diesel 20 litres leh ralna sum Rs. 3,000 an hlan bawk.
CYLA hruaitute hnen atanga thudawn danin, vawiin hi Tv. B. Lalrozama a tlak ni atanga chhiarin a ni 6-na a ni a, YLA hnatlang ni 5-na a ni bawk a, hmasawnna em em a la awm thei lova, tui lian in tlem tlem in kam lam a pan hret hret zel a, vaukam lam hrutin ruang zawn hna thawh mek zel a ni. Vawiin ruang zawnnaah hian YLA Hruitezawl Branch te leh Tuidangchhuah Branch ten Lungmawi chhak lipui vel a ruang an hmuh fo na thin an vil leh mek a, theih tawp an chhuah ve mek zel bawk. Tin, YLA Rulkual Branch chhunga Liapha Section lam pawhin an khaw bul tuipui kam vel an vil ve tan bawk.
Vawiin ruang zawnnaah hian Pu H. Biakzaua, MLA aiawhin Pu S. Lalrinsiama'n Diesel 20 litres leh Rs. 2,000 a pe a. Pu Sanghuliana Mualchin, Chairman, Town Committee, LADC chu a hmunah kalin tanpuina leh ral a hlan a, heng tanpuina te hi MTP Tuipui Ferry te hnenah hlan a ni. Vawiin vek khan Pu Hc. Lalthawmliana, EM i/c PHE, etc, LADC chuan ruang zawngtute tawiawmin a hmunah a kal a, Pu Hc. Lalthawmliana hi a hranpain tanpuina pe turin a kal leh dawn a ni. MADC lam atangin Pu Lalmalsawma Zasai, Dy. CEM MADC in YLA hnatlang te tlawhin thingpui lumna tur a pe a, YLA hnenah lawmthu sawina a nei bawk a ni.
Naktuk, September 11, 2022 hian ruang zawn pui turin Town Branch atangin YLA College Veng Branch, AOC Branch leh Thingkah Branch te an thawkchhuak ve leh dawn a ni.
Post a Comment